Urang Bagak-palanta

“Minyak situang-tuang, ditanak dalam kuali. Urek manjadi tulang, tulang manjadi basi.” “Ha...ha...., apo tu Ncu?” “Kalau soal batandiang bagak, den lai masih basalero juo mah.” “Yo, apo tu, pagi-pagi lah bantuak ka mambunuah urang se Uncu nampaknyo. Dima tasapo tadi? Atau barasian bacakak Uncu ndak?” “Jan banyak bana tanyo Din. Lai kawek galang-galang Udin?” Baitulah padebatan antaro Uncu Labai jo Udin Kuriak. Indak jaleh apo sababnyo, makonyo Uncu basikap sarupo ka mamakan urang se pagi kapatang. “Kok iyo lai bagak Uncu, ado paluang manarimo gaji dari pamarentah mah,” kecek Udin. “Ha...., iyo itu bana nan den mukasuik mah. Kalau soal pareman dulunyo den ko lai makan masak-matah juo. Jadi, pak wali indak paralu mancari jauah-jauah bana, kalau memang paralu urang bagak atau tukang pukul. Durian se nan tajam-tajam durinyo nyanyak dek tangan den,” kato Uncu. “Ha...ha..., kecek den kok iyo mabuak Uncu tadi tu, ruponyo ado kaitan jo barita koran hari ko yo. Hebat Uncu nampaknyo,” Angah Piyan nan dari tadi nampak katakutan kasudahannyo mangecek. “Jadi baa dek Angah? Saandainyo memang pamarentah paralu tukang pukul atau urang bagak, kok sato den mandaftar baa nyo?” Tanyo Uncu ka Angah. “Kalau Uncu mandaftar, den sato pulo,” baleh Angah. “Angah se panggaca. Tadi den caliak lah pucek bibia Angah,” manyalo pulo Mak Pono. “Tadi tu bukan takuik Mak, tapi heran. Baa kok tibo-tibo Uncu sarupo urang mabuak, eh ruponyo ado barita baraso pamarentah di siko paralu duo ratuih tukang pukul,” jawek Angah. “Sadangkan indak dicari tukang pukul, lah banyak juo nan manjadi korban. Banyak nan manjadi urang bagak se di kota ko. Pitih urang, pitih inyo juo. Galeh urang, harato inyo juo. Indak amuah urang maagiah, dilampang atau saindak-indaknyo dipacaruik-i. Kini, itu pulo nan ka dipaliharo,” kato Kudun. “Tapi iko kan untuak tanago kaamanan. Untuak maamankan kota ko. Jadi urang-urang bagak tu diagiah saragam dan diagiah gaji. Sia nan malangga aturan, baurusan jo urang-urang tu. Satpol pepe namonyo,” kato Udin. “Den raso cukuiklah tanago nan ado kini. Apo bana aturan nan manjadi bidang pol pepe tu? Kan ado polisi mah,” kecek Mak Pono. “Pol pepe tu kan untuak maamankan masalah perda,” jawek Udin. “Lai tau den mah, pandapek den cukuik selah tanago nan ado kini,” baleh Mak Pono baliak. “Wak den indak satuju istilah tukang pukul doh. Karano satpol pepe, gunonyo bukan untuak mamukul. Pol pepe adolah warga biaso nan diagiah kalabiahan saketek, gunonyo managak-an perda. Indak ado nan musti ditinju, dilampang atau disipaktarajangan doh. Paraturan indak ka tagak jo kakarasan doh. Malah bisa batambah rumik masalah deknyo. Baa pandapek Tan Baro?” Kari Garejoh mangaluakan pandapeknyo. “Batua. Kalau memang pamarentah ka manambah pasukan pol pepe, ijan dicari tukang pukul, tapi carilah nan baetika atau nan bisa maadokan pandakatan ka warga sacaro elok-elok,” hanyo itu pandapek Tan Baro. Dek hari lah baransua tinggi juo, urang-urang tu bubar tanpa ado kasimpulan. (eSPe St.Soeleman)