Lah Balambin Dipijak Pulo-Palanta

“Di tampek awak ko ado pepatah atau pribahasa mangatokan, sudah jatuah diimpok janjang pulo, tapi di Libia ado lo pribahasa mangatokan, lah balambin dipijak-pijak pulo,” kato Kari Garejoh ka konco-konconyo nan samo duduak di palanta lapau Uwo Pulin pagi kapatang. Di lapau tu indak hanyo ado Tan Baro jo kawan-kawannyo nan biaso minum pagi di lapau tu, tapi juo ado urang-urang nan hanyo punyo kasampatan duduak ka lapau sakali sapakan atau satiok hari perai karajo sajo. Urang-urang sarupo itu adolah nan bakarajo di kantua-kantua pamarentahan atau guru. Ado juo karyawan swasta dan supir belok jauah nan pulangnyo indak bakatantuan. “Baa pulo kok itu nan takana dek Kari?” Tanyo Angah Piyan sambia mampaelok-i duduaknyo. “Kan iyo dek Angah tu. Lah basuluah matoari, lah bagalanggang mato rang banyak. Saluruh media di dunia mambaritakan kajadian angek dari negara tu. Pamimpin nan lah ampek puluah tahun bakuaso, balambin dek ulah dijatuahan dek rakyaiknyo surang. Indak cukuik dijatuahan se doh, tapi juo ditembak, dielo-elo dan dipijak-pijak. Sabana i8ndak bantuak manusia dipakukan dek rakyaiknyo lai. Lah sabana jajok bin jajok rakyaik jo inyo,” jawek Kari. “Di nagari awak ko ampia lo tajadi nan bantuak itu dulu mah. Kalau pamimpin nagari awak indak capek manyadari apo kainginan rakyaik, mungkin bisa tajadi pulo nan sarupo di Libia tu,” potong Udin. “Den raso indak sampai bantuak itu di siko doh. Urang-urang awak ko masih punyo budaya. Masih punyo raso-raso. Ciek lai masalahnyo indak samo doh. Nan di Libia tu pamimpinnyo ongeh, sombong dan batangan basi. Makonyo nan mambarontak indak hanyo rakyaik, tapi juo militer. Sadangkan di nagari awak masih ado toleransi jo musyawarah. Nan manuntuik baru rakyaik jo caro-caro nan masih babudaya,” kato Angah. “Jadi, ikolah akibaiknyo kalau pajabaik indak paduli jo rakyaiknyo. Pajabaik nan batangan basi atau diktator, bisa dijatuahan dek rakyaik surang. Harusnyo iko manjadi palajaran dek pamarintah di negara-negara lain, tamasuak di negara awak. Bia awak manjadi pamimpin dan bakuaso, suaro rakyaik tolong juo didangaan. Agiah kandak jo kabutuhan rakyaik. Jan sakali-kali mamimpin pakai tangan basi. Kan iyo bantuak itu harusnyo ndak Tan Baro?” Kato Kari sambia mitak pandapek ka konco palangkinnyo nan sadang mambaliak-baliak koran ‘Singgalang’. “Iyo. Ado pepatah mangatokan ‘elok-elok urang di ateh, nan di bawah kok manjatuahan’. Satinggi apo pun jabatan jo kakuasaan, ingek ado rakyaik di bawah. Ijan pernah malupokan rakyaik. Khusus di nagari awak, pamimpin harus sadar baraso inyo naiak dek ulah dipiliah rakyaik. Kalau indak dinaiak-an dek rakyaik, inyo indak ado apo-apo tu doh. Nah, kalau sempat malupokan rakyaik itu namonyo kualat kecek urang subarang mah,” hanyo itu komentar Tan Baro sambia manjangkau kopi nan lah dingin di piriang tadah. “Nah, barangkali iko banyak nan dilupoan dek pamimpin awak ndak. Katiko kampanye lamak opok jo umbuak ka rakyaik. Bak kecek urang kampuang den, lunak gigi daripado lidah supayo rakyaik mamiliahnyo. Tapi katiko inyo lah dapek jabatan jo kakuasaan, lupo kabutuhan rakyaik deknyo,” manyalo pulo Mak Pono. Baitulah situasi dan ota urang-urang di lapau Uwo pagi kapatang. (eSPe St.Soeleman)