Lupo Satangah-Palanta

“Ado-ado se nan dijadian barita dek koran ‘Singgalang’ ko nampak di den Tan!” Sorak Ajo Tondeh ka Tan Baro nan duduak agak bajauahan. “Apo tu?” Tanyo Tan Baro. “Iko ha, kecek e untuak manarimo bantuan gampo kancang, tapi manaiak-an bandera satangah tiang lupo,” jawek Ajo. “Itu kan batua Jo. Memang iyo bantuak itu kanyataannyo. Ambo paratian indak bara urang nan sato manaiak-an bandera doh. Indak usah awak caliak jauah-jauah, di sakitar awak ko lai bara rumah nan mamasang bandera satangah tiang nampaknyo? Nan indak buliah tu surek kaba mambuek barita nan indak tajadi. Kaba kancia atau kaba garagasi indak laku di koran doh,” baitu tanggapan Tan Baro. “Den satuju iko manjadi barita Jo. Karano manaiak-an bandera satangah tiang di tanggal tigo puluah September tu indak hanyo untuak mamparingati gampo, tapi juo mamparingati kajadian sejarah bangsa ko. Tanggal tigo puluah September tu adolah hari pangkhianatan pe-ka-i di Indonesia. Di tanggal itulah jenderal-jenderal hebat dibunuah dan dikubua di Lubang Buayo dek pe-ka-i. Jadi, kalau banyak urang di nagari ko nan indak manaiak-an bandera satangah tiang, itu iyo katalaluan namonyo. Tandonyo awak indak maharagoi sejarah dan indak pernah maraso sadiah jo kajadian-kajadian di Lubang Buayo tu, tamasuak kajadian gampo di nagari awak ko. Khusus gampo lah samo tau awak, ribuah nyawa malayang, ribuah rumah hancua. Malah sampai kini masih ado juo nan alun manarimo bantuan lai,” kecek Angah Piyan. “Satuju!” Sorong Kari Garejoh. “Satuju apo? Baru duduak lah mangecek satuju se sakali,” kato Udin Kuriak. “Wak den satuju kalau satangah awak ko memang hanyo pandai manuntuik hak se nyo. Agak lambek se pamarentah mambagian bantuan, eboh. Tapi giliran pamarentah manyuruah mamasang bandera satangah tiang, banyak nan lupo. Antah iyo lupo atau balupo-lupoan, ndak lo tau den doh,” jawek Kari. “Di rumah Kari lah tangah hari den caliak baru ado bandera satangah tiang,” potong Udin. “Bialah talambek daripado indak sato samo sakali Din. Induak bareh den talambek mamasang bandera, karano indak takana dima lataknyo. Nah nan lain tu apo alasannyo? Apo samo lo jo alasan induak bareh den tu? Harusnyo awak saimbangkanlah antaro hak jo kawajiban,” baleh Kari. “Paralu palajaran pe-em-pe untuak anak sikola baliak mah Ri. Sudah tu masyarakaik ko diagiah panataran pe-ampek supayo jaleh hak jo kawajibannyo,” kato Tan Baro. “Iyo Tan. Memang di nagari ko lah banyak nan dilupoan. Urutan Pancasila se juo lupo,” baleh Kari. “Owaik, lah parah mah ye!” Kato Ajo. Baitulah ota di lapau Uwo Pulin pagi kapatang. Salain masalah bandera satangah tiang dalam rangka duo tahun gampo, juo ado barita-barita lain nan dijadikan bahan ota, sarupo kapa tabang nan jatuah, buronan nan bisa mambangun hotel di Bali, anak korban kabakaran nan mintak sidakah sarato lainnyo. Sampai siang urang-urang tu batahan di lapau Uwo. Maklum, hari Akaik adolah hari libur karajo dek komunitas lapau tu. (eSPe St.Soeleman)