Nasib Lampu Togok

[ESPE ST. SOELEMAN] Salamaik pagi pambaco koran ‘Singgalang’ kasadonyo. Pernah mancaliak lampu togok? Atau minimal mandanga namonyo sajo? Barangkali dek nan lahia di bawah tahun 1970-an lampu togok indak asiang lai doh. Karano wakatu itu hanyo urang-urang di kota sajo baru nan manikmati aliran listrik. Kalau nan iduik atau tingga di nagari-nagari atau dusun-dusun, banyak mamakai lampu togok. Nan lai agak barado bisa mamakai lampu tarongkeang. Untuak anak-anak nan lahia di ateh tahun 1990-an iyo lah agak payah mancari lampu togok. Tapi sakadar manyamoan sajo, lampu togok indak bara beda jo lilin. Saindaknyo nasibnyo ampia samo. Kalau dulu lampu togok manjadi pamain utamo di malam hari, tapi kini hanyolah manjadi palengkap panderita sajo. Atau buliah juo dikatokan manjadi peran pangganti sajo. Kini, pamain utamonyo adolah listrik. Di mano sajo, kalau listrik mati di malam hari, urang punyo rumah pasti karapiak panja mancari lampu togok atau lilin. Kadang, sampai main ariak-bangak bagai di ateh rumah. Apak paja maariak induak bareh, induak bareh maariak anaknyo pulo supayo capek-capek mancari lampu togok atau lilin. Katiko itu iyo taraso bana pentiangnyo lampu togok atau lilin. Buliah dikatoan inyo manjadi pahlawan dan kahadirannyo dipuji-puji. Tapi, taukah kito kalau listrik lah manyalo baliak? Lampu togok atau lilin tadi kadang indak tantu kama dilatak-an lai. Sasudah dimatian apinyo, kadang ado nan manyipaknyo sampai ka dapua, kadang masuak gai ka bawah lamari dan nan lai bauntuang dilatak-an elok-elok di dakek kompor nan lah itam dek arang. Sampai listrik padam baliak, nan lampu togok atau lilin indak ka barasak dari situ doh. Itulah nasib si lampu togok. Katiko mauntuangkan untuak urang punyo rumah, inyo dicari-cari. Kalau paralu dipuji-puji. Tapi, katiko ado nan labiah, si togok manjadi barang indak baharago samo sakali. Apo maknanyo dalam iduik jo kaidupan awak? Kabanyakan awak bakawan, mancaliak urang nan lai mambao untuang untuak diri surang. Untuak sakadar contoh dalam dunia politik. Manjalang pamiliahan anggota legislatif atau pamiliahan kapalo daerah, baitu banyak urang hebat dan urang kayo nan mandakek ka masyarakaik ko. Inyo datang jo galak manih, kucindan murah. Tujuannyo tantu supayo masyarakaik basimpati dan mamiliahnyo dalam pamiliahan. Tapi, tahukah awak, katiko tokoh atau urang hebat tu lah tapiliah? Masihkah takana inyo jo masyarakaik nan dulu mamiliahnyo? Kadang, kawan dakek bana sajak ketek, indak manyapo lai. Karano memang indak mambao untuang untuak dirinyo surang. Ikolah kanyataan kini. Dunsanak atau pakawanan diukua jo etong-etongan ekonomi. Kok lai ka mauntuangkan, dipakai. Tapi kalau indak, yo diabaikan sajo. Mudah-mudahan sajo di antaro pambaco koran ‘Singgalang’ nan budiman indak ado mamakai prinsip atau kabiasaan bantuak itu. Ingek, di dunia ko indak ado nan abadi. Salamo-lamo manjadi urang hebat pasti akan manjadi urang biaso. Bak kecek Uniang Elly Kasim, iduik ko bak roda padati. (*)