Indak Pakai Raso-raso-Palanta

“Lah bantuak itu nagari awak dilanyau banjir, mamakiak rakyaiknyo alun makan, indak ado bantuan dari urang-urang punyo kabun saketek juo. Salamo ko, tanah urang-urang di situ dijadian tampek mancari pitih.” Kato-kato bantuak itu kalua dari Udin Kuriak sasudah mambaco barita di koran ‘Singgalang’. Dari sakian banyak judul barita nan dibaconyo, ciek bajudul ‘Rakyat Pasbar Dilecehkan. Perusahaan Sawit tak Peduli Korban Banjir’. Itu pulolah barita nan dijadian modal ota dek Udin. “Sia nan indak mambantu Din?” Tanyo Mak Pono. “Di Pasaman Barat tu kan banyak parusahaan kabun sawit. Nah, ruponyo indak ado kapadulian urang punyo kabun tu untuak mambantu masyarakaik nan lah tabanam dek banjir,” jawek Udin. “Kecek sia Din?” Tanyo Angah Piyan nan kabatulan baru masuak ka dalam lapau. “Iko ado baritanyo. Dalam barita ko den baco, di situ ado sambilan baleh parusahaan kabun sawit nan gadang. Saandainyo rato-rato mambantu saton bareh se, lah sambilan baleh ton tabantu masyarakaik mah. Atau rato-rato mambantu sapuluah juta, mako lah saratuih sambilan puluah juta bantuan mah. Den raso bantuan sabanyak itu bisa maringankan baban parasaian masyarakaik situ,” baitu jawek Udin. “Inyo di situ indak untuak manolong warga doh Din, tapi baladang sawit,” tadanga sorak Kari Garejoh. “Itu batua, tapi sarancaknyo pakai raso-raso juolah. Lah jaleh baladang di tanah urang, tapi katiko urang punyo tanah mandapek musibah, bantu juolah!” Kato Udin baliak. “Raso-raso nan kurang mah!” Kato Mak Pono. “Batua Mak! Kalau urang nan punyo raso-raso, pasti inyo maraso malu kalau indak bisa mambantu urang punyo tanah nan dalam kasulitan, apolai nan ditimpo musibah bantuak itu. Sadangkan urang dari jauah, indak ado haratonyo di situ, lah mambantu juo. Iko, tiok hari bakureh di tanah urang tu, tapi katiko datang musibah bantuak kapatang, inyo icak-icak indak tau se,” mangecek pulo Tan Baro. “Kadang-kadang urang kayo tu kan banyak lo nan ongeh, Tan. Karano pitih jo haratonyo banyak, inyo maraso indak paralu jo urang lain doh. Malah, ado pulo nan baprinsip manolong urang lain bisa mangurangi kauntuangan parusahaannyo,” semba Malin Kacindin. “Nah, mungkin bisuak-bisuak ko kalau ado juo investor nan ka mambukak usao di tampek awak, paralu ditanyo bana saleronyo. Lai ka bisa saiyo-satido jo masyarakaik? Lai ka bisa ka bukik samo mandaki, ka lurah samo manurun? Lai ka ado kontribusinyo untuak korong jo kampuang bagai? Ijan dikacak langan bak langan se nyo di kampuang awak,” kecek Tan Baro pulo. (eSPe St.Soeleman)(singgalang)