Tamakan Bareh Cianjur

Antah apo sababnyo, Kari Garejoh bacarito masalah bareh. Inyo mangatoan bareh nan paliang lamak tu bukan bareh dari kampuang Mak Pono, tapi bareh Cianjur.
Tantu sajo pandapek Kari tu ditantang dek kawan-kawannyo. Apolai Mak Pono pasti indak maraso sanang dikatoan bareh dari kampuangnyo indak salamak bareh Cianjur. Saparo mangatoan Kari indak punyo raso kakampuangan.
“Lai ndak kanai Kari ko? Saluruh urang di nagari ko mangatoan baraso bareh Solok indak ado tandiangannyo, tapi kini tibo-tibo Kari mangatoan bareh Cianjur nan labiah lamak. Apo lah ilang raso kadaerahan dek Kari? Atau lidah tu bana nan lah mati raso” Baitu pandapek Angah Piyan.

“Kanai baa pulo dek Angah? Urang banyak buliah-buliah se bapandapek bareh Solok paliang lamak dan den juo maakui,” baleh Kari.
“Jan babaliak-baliak Ri. Tadi bakatoan bareh Cianjur nan labiah lamak, kini lai maakui bareh Solok nan paliang lamak. Mano pandapek Kari nan ka dipacik ko?” Kato Angah baliak.
“Kalau bareh Solok, awak makan jo sambalado pasti indak nampak mintuo lalu. Kan iyo ndak Mak?” kato Kari mampaiyokan ka Mak Pono.
“Syair lagua Cik Uniang Eli Kasim iyo sarupo itu,” hanyo itu jawek Mak Pono.
“Itu juo den akui, tapi kalau tamakan bareh Cianjur, bisa lupo jo bini. Lah babini, bisa-bisa dikatoan masih bujangan,” kecek Kari.
Samakin karuik kaniang urang salapau tu dek mandanga panjalasan Kari.
“Apo mukasuik Kari ko? Indak mangarati kami doh. Atau, jan-jan Kari kanai ati ka urang Cianjur ndak?” Udin Kuriak lah mangecek pulo.
“Ha....ha...., iyo sabana indak jalan kincia-kincia surang juo nampak di den. Koran lai ado tapi cuma sakadar dibaliak-baliak se, atau untuak mancaliak-caliak gambar. Bacolah saluruh barita nan ado baa nyo, supayo indak katinggalan informasi. Bacolah barita ketek nan ado di suduik koran ko ha!” Kari mancaliak-an barita di laman muko nan bajudul ‘Anggota DPRD Pariaman Dikejar Wanita Cianjur’.
“Oh, itu..... Iyo tu Jo?” Hanyo itu nan bisa dikatoan Udin sambia batanyo ka Ajo Tondeh.
“Ma den tau. Piaman kan laweh,” jawek Ajo mamasang wajah dingin.
“Iko nan ndak lamak ciek. Kalau nan hebat atau nan rancak diakui dunsanak Ajo atau balancik-lancik-an rumah jo rumah awak, tapi kok nan buruak lansuang se mangecek Piaman laweh,” kato Angah.
“Ha....ha...., lah sarius bana lo den tadi mananggapi pandapek Kari, ruponyo iko mukasuiknyo. Den akuilah kalau dek ulah bareh Cianjur ado nan lupo jo bini,” potong Mak Pono.
“Dek ulah mancaliak barasiah bareh Cianjur lupo jo pirang bareh kampuang awak yo Ri!” Tan Baro nan dari tadi anok se lah sato pulo sakaki mangaluakan pandapeknyo.
“Iyo Tan! Mudah-mudahan se indak banyak anggota dewan nan bantuak iko,” hanyo itu nan bisa dikatoan dek Kari lai. (eSPe St.Soeleman)