Palanta Lapau-Oto Putuih Rem

“Lah bantuak oto putuih rem se si Nazar ko nampak di den, Ngah. Baa caritonyo tu?” Kato Mak Pono ka Angah Piyan nan pagi kapatang duduak baadok-adok an di lapau Uwo Pulin. “Baa bana oto putuih rem tu Mak?” Kudun batanyo. “Alun pernah Kudun mancaliak oto putuih rem lai?” Mak Pono baliak batanyo. “Alun!” Jawek Kudun. “Bulan kapatang ado oto prah mambao simin putuih rem di panurunan Sari Manggih. Di situ ado pondok-pondok urang manjua buah-buahan. Lah disasaunyo dek oto prah tu kasadonyo. Lah abih galeh urang kampuang den tu deknyo. Jadi, oto putuih rem tu, indak tantu adok lai doh. Apo se nan ado bisa dilandonyo. Nah, kiro-kiro bantuak itulah si Nazar. Lah banyak se urang nan kanai dek parangainyo,” baitu Mak Pono manjalehan langkok pakai contoh. “Di kampuang den samo jo ciliang buto mah,” solang Kudun. “Si Nazar ma ko Mak? Di kampuang den ado pulo namonyo Nazar,” apo nan dikatoan Mak Pono ditanggapi Tacin Barain. “Manga jauah-jauah bana ka kampuang Tacin, di komplek awak ko juo ado namo Nazar,” kato Angah Piyan. “Kalau si Nazar di komplek ko manggaleh babelok. Tapi nan den mukasuik adolah si Nazar nan diebohan ka-pe-ka dan diburu sampai ka lua nagari. Kabanyo kini juo ado sayembara, sia nan bisa manangkok paja tu dapek hadiah saratuih juta,” baleh Mak Pono. “Bisa se nan kanai dek Nazar itu iyo sato manarimo, Mak! Kan alah bak kato pameo di nagari ko, kalau indak ado api ndak mungkin ado asok. Ciek lai, indak ka mungkin si Nazar tu manyabuik namo urang-urang hebat dan urang-urang bapangaruah. Karano, manuduah tanpa bukti tu kan pancemaran namo baiak dan si Nazar bisa dituntuik baliak. Tapi sapangatahuan den, sampai kini alun ado di antaro urang-urang nan disabuik tu mangatoan ka manuntuik si Nazar lai,” Kari Garejoh lah sato pulo mangaluakan pandapeknyo. Antah dari ma pulo inyo tau baraso tokoh-tokoh nan disabuik Nazar tu indak manuntuik. “Wak den kalau dituduah-tuduah se indak badasar atau indak ado bukti, mati je amuah mah untuak mambela diri, baa gak ti?” Potong Ajo Tondeh. “Iyo. Den raso urang-urang nan disabuik dalam nyanyian Nazar tu kini sadang maasah-asah ladiang untuak mambaleh mah. Karano, walau iyo sato manarimo, tapi disabuik-sabuik ka urang banyak pasti indak lamak,” Udin Kuriak indak pulo katinggalan basuaro. “Kabanyo pakai oto kampas dibao pitih yo?” potong Uncu Labai. “Iyo Ncu!” Hanyo itu jawek Mak Pono sambia mamintak tambah aia ka Uwo Pulin. Di lua langik nampak janiah. Rumah-rumah warga banyak nan tutuik tandonyo lah bi pai karajo. Sakileh lah taraso nuansa bulan puaso. (eSPe St.Soeleman)