Palanta Lapau-umega

Kudun nampak bantuak urang panik. Tiok sabanta maelo angok dalam-dalam. Duduaknyo indak tanang. Saolah-olah sadang duduak di ateh baro angek. Parubahan bantuak itu nampak jaleh dek Udin Kuriak nan duduak basubarangan meja jo inyo. Indak biaso-biasonyo Kudun sarupo itu. Dalam pangana Udin pastilah ado nan indak beres atau masalah nan indak salasai. “Baa Dun, galisah se nampak di den sajak tadi.” Baitu kato Udin nio tau apo masalah nan sadang dirasoan dek konco palangkinnyo. “Itulah Din. Alun cukuik duo pakan anak-anak basikola lah banyak pitih nan musti dikaluakan. Buku-buku lah pasti wajib. Karano buku kakaknyo nan taun kapatang indak bisa dipakai lai. Sudah tu ado pulo katonyo pambali el-ka-es dan banyak lai macamnyo,” baitu jawek Kudun manjalehan apo nan sadang dipikiannyo. “Eh, indak buliah mambali el-ka-es doh Dun!” Tibo-tibo Angah Piyan satangah basorak. “Indak buliah baa pulo. Tu mah buktinyo kapatang anak den mintak pitih, katonyo pambali el-ka-es,” baleh Kudun. “Ado baritanyo di koran ‘Singgalang’ hari ko mah. Guru-guru atau rumah sikola indak buliah manjua el-ka-es ka anak murik. Kalau ado kato pajabaik nan mangecek tu, ka diagiah hukuman. “Ha....ha.....barabab ka talingo kabau mah Din!” Manyalo pulo Uncu Labai. “Mukasuik Uncu?” Tanyo Udin nio tau mukasuik kantinyo tu. “Nan bantuak iko sajak saisuak lai mah. Sajak dulu pajabaik salalu malarang ijan ado guru nan manjua el-ka-es atau manjua pakaian saragam bagai. tapi dalam kanyataannyo baa? Baitu juo soal iyuran-iyuran, lah maruwok muncuang pajabaik dek bapidato malarangnyo, tapi nan iyuran jalan juo. Indak buliah guru atau kapalo sikola, komite sikola nan ma munguik iyuran. Intinyo kan samo-samo mambarek an urang tuo murik juo tu nyo,” kecek Uncu manjalehan. “Umega mah Ncu!” Tadanga pulo sorak Kari Garejoh. “Apo juo nan ka umega-umegaan lai. Gaji pagawai naiak tiok tahun mah,” baleh Uncu. “Buliah-buliah se guru mambuek umeganyo, tapi jan manggaleh di rumah sikola, dan ijan sampai ado kasan wajib. Salamo ko kan saolah-olah apo nan dijua tu wajib dibali dek anak murik. Agiah kabebasan ka anak murik untuak mambali di toko buku, atau mamakai punyo kakaknyo,” kato Angah Piyan Pulo. “Batua Ngah. Kalau ka umega-umega juo, galehlah makanan atau kaparaluan lain, tapi jan di dalam rumah sikola dan jan dipasoan ka murik untuak mambalinyo,” kato Kudun.(eSPe St.Soeleman)