Palanta Lapau-Dilarang jo Palarangnyo

Di surek kaba ‘Singgalang’ kapatang ado duo barita masalah parkir dilatak-an badakek-an. Partamo judulnyo ‘Dilarang Parkir di Atas Jembatan Air Tawar’. Nan kaduo bajudul ‘Tarif Parkir Tidak Naik Selama Lebaran’. Kaduo barita tu manarik dek komunitas lapau Uwo Pulin. Karano mancaliak contoh ka nan sudah, tuah ka nan manang, kadonyo memang masalah manahun.  Di ateh jambatan Aia Tawa tu memang kadang-kadang lah manjadi tampek parkir se. Pamandangan jaleh bantuak itu katiko hari libur atau hari-hari tatantu. Urang-urang punyo oto nan mamarkir kandaraan di situ adolah tamu tampek balanjo moderen nan ado di dakek jambatan tu. Di ma sajo, sampai kini indak ado jambatan nan buliah manjadi tampek parkir doh, eh, nan di Aia Tawa tu malah dipabiakan sajo. Walau di dakek situ ado pos polisi, tapi nan parkir di ateh jambatan dipabiakan sajo. “Kalau nan parkir di ateh jambatan Aia Tawa tu den raso indak salah supir doh Din,” kato Mak Pono. “Baa tu?” Tanyo Udin. “Karano di tampek balanjo tu kan ado patugas nan digaji dek urang punyonyo khusus maatur-atur parkir. Nah, kalau memang indak tamuek parkir di dalam, katoan ka supir supayo indak parkir di ateh jambatan. Salain itu, patugas polisi kan ado di dakek jambatan tu. Ado posnyo situ mah. Kalau indak, di bengkolan dakek lampu merah juo ado pos polisi. Apo salahnyo polisi malarang urang parkir di ateh jambatan tu,” jawek Mak Pono. “Apak tu batugas mancaliak-caliak urang bakandaraan nan patuik ditilang atau ditangkok Mak!” Potong Kari Garejoh. “Kok candu bana manilang, manga indak ditilang se nan parkir di jambatan tu?” baleh Mak Pono. “Di den indak itu se nan manjadi masalah doh Mak. Tukang parkir ko kadang-kadang lah bantuak barajo surang lo inyo. Hari rayo atau di tampek-tampek nan rami inyo mambuek aturan surang se. Kadang-kadang itu hanyolah pareman-pareman sajo. Bayia parkir bisa naiak saratuih parsen dan bahkan labiah. Barangkali iko pulo nan mambuek pak gubenur mangaluakan surek edaran supayo parkir indak dinaiak an,” kato Angah Piyan. “Den raso edaran gubenur tu akan tingga edaran se nyo. Nan tukang parkir ka babuek sakandak hatinyo se. Kalau indak picayo mari awak buktikan di daerah-daerah wisata lebaran bisuak ko. Dari pangalaman tahun-tahun lapeh, ado objek wisata tatantu nan punyo tarif parkir samo jo tarif parkir gajah,” kato Kari Garejoh. “Sabananyo samo jo ota awak kapatang. Ijan hanyo manyuruah tapi japuik. Nah, masalah parkir ko juo bantuak itu, ijan hanyo malarang tapi larang jo palarangnyo,” tibo-tibo Tan Baro sato mangecek. “Mukasuiknyo Tan?” Tanyo Udin. “Yo, kalau dilarang parkir di ateh jambatan, harus ado solusinyo. Harus ado tampek parkir untuak urang-urang nan pai balanjo di situ. Kalau paralu urang punyo tampek balanjo tu manyadiokan tanah khusus atau tambah ciek lantai lai untuak parkir. Baitu juo masalah tarif parkir, ijan hanyo surek edaran sajo, tapi ado nan mangawasi andaknyo. Kalau indak ado nan maawasi, yakinlah nan biaya parkir bak kato tukang parkir se bisuak tu nyo. Yakinlah!” Baitu Tan Baro maagiah pan jalasan ka kawan-kawannyo. “Suruah lantai se batang aia tu deknyo untuak tampek parkir,” salo Tacin Barain. Rasonyo apo nan dikatoan Tan Baro tu bisa ditarimo aka. Karano memang lah manjadi kabiasaan urang awak hanyo takuik kalau ado nan maawasi. (eSPe St.Soeleman)