Ano nan ka Ditiru

Mambaco barita di koran ‘Singgalang’ nan bajudul ‘PKL Bukittinggi Bisa Jadi Contoh’, Mak Pono punyo pangalaman nan indak bisa dilupoan. Katonyo, pernah dikasari dek urang manggaleh pakaian. Cuma sajo, Mak Pono indak manyabuik-an di toko apo inyo mandapek pangalaman paik tu. “Kajadian ko manjalang rayo tahun nan lapeh. Wak den pai mancari pakaian lebaran untuak anak-anak. Namonyo awak mancari pakaian, tantu dicaliak-caliak dulu. Kalau ado nan katuju awak tanyoan haragonyo. Tapi, di ciek toko, lah sudah mancaliak-caliak pakaian tu dan indak ado nan katuju, den maluncua jo anak-anak kalua. Di situlah den dikasari dek urang manggaleh,” Mak Pono baranti sabanta bacarito. “Apo keceknyo Mak?” Tanyo Udin Kuriak. “Kok indak ka mambali manga dibaliak-baliak galeh urang. Jaleh tadanga dek talingo den. Kalaulah indak sadang bapuaso wakatu itu dan indak sadang samo anak-anak, iyo babaliak darah mudo den. Lah sagadang cacak paja tu nampak di den. Tapi untuang se, puaso lai bisa mangandalikan emosi den wakatu itu,” baitu carito Mak Pono. “Memang palayanan buruak masih banyak wak tamui di urang-urang manggaleh. Apo nan manggaleh di toko, maupun di kaki limo. Ado nan awak saolah-olah dipasonyo mambali. Nan banyak tu awak dipatelean. Lah tabik api dek baarago, maraso indak sasuai rueh jo buku, tantu awak kalua untuak mancari tampek lain. Eh, baru limo langkah bajalan, diariaknyo wak baliak. Lah babaliak awak, indak juo cocok doh. Inyo cuma manurunkan harago saketek se. Kasudahannyo tantu awak pai baliak. Tapi katiko wak pai tu inyo manyuruah, ambiaklah pak, ambiaklah. Iko kan mambuek awak kesal atau maraso dipamainkan,” Uncu Labai sato pulo. “Makonyo mancontohlah ka urang manggaleh di Bukit Tinggi. Walau pasaiangan urang manggaleh di situ ketat, tapi ano ramah-ramah. Kok lalu di muko urang manggaleh sanjai misalnyo, ano pasti mangecek, ‘singgalah minantu. Nan badaruak lai ko ha. Singalah!’ Mandanga imbau jo suaro lamah lambuik bantuak itu awak maraso tatarik. Kalau tadi indak ado rancana mambali, tapi mandanga rayuannyo, tabukak puro deknyo,” baitu kato Angah Piyan. “Itu tandonyo ano lai punyo hati mah. Ko indak, ado pulo nan main patang se,” kecek Mak Pono baliak. “Ambo satuju jo barita di koran ko, yaitu manjadian urang manggaleh di Bukik Tinggi tu untuak contoh. Kalau paralu adoan samacam panataran. Jo caro itu, urang-urang balanjo maraso sanang,” kato Tan Baro pulo. “Panataran pulo rang manggaleh tu tantu tagaduah ano manggaleh. Saindaknyo abih hari agak sahari deknyo. Nan rancak tu, datangi dek patugas nan ditunjuak ka tiok toko atau urang manggaleh, ajaan caro nan sopan dan lamah lambuik bantuak di Bukik Tinggi tu,” potong Kari Garejoh. “Kok dapek supir-supir oto umum juo diajaan caro malayani konsumen ndaknyo. Salamo ko, banyak supir nan main caruik se. Stek-stek bacaruik. Saolah-olah bagayuik caruik di bibianyo,” usul Udin Kuriak pulo. “Ano lah tabiaso bacaruik mah,” semba Tacin Barain. Baitulah ota di lapau Uwo Pulin pagi kapatang. Sarupo biaso, ota pasti bamulo dari barita koran ‘Singgalang’ nan lah batahun-tahun dilanggani di lapau tu. (eSPe St.Soeleman)