Palanta-Guluang Selah!

‘Pemerintah Kembali Ancam Datangkan Taksi Baru’. Itulah ciek judul barita nan manjadi paratian dek Kari Garejoh. Maklum, dulunyo Kari adolah supir angkutan kota, tantu banyak saketeknyo punyo paratian ka barita-barita nan punyo hubuangan jo oto atau supir. Barita nan dibaco Kari tu mangatokan, taksi-taksi nan ado di nagari ko banyak nan indak layak jalan. Rato-rato taksi tu lah baumua tuo. Jumlah taksi nan ado tu ampek ratuih salapan, tapi nan lai masih layak jalan cuma sakitar saratuih buah se nyo. Sadangkan kecek pamarentah, nagari ko paralu taksi labiah saribu. “Kalau memang paralu taksi labiah saribu, tantu pangusaha taksi di siko harus manambah armadanyo,” baitu kato Kari. “Kan sajak dulu pamarentah maagiah kasampatan ka pangusaha lai, tapi indak ado panambahan. Pernah pulo pangusaha dari Jawa nio masuak jo taksi-taksi rancaknyo, tapi diprotes. Di siko tabukti urang awak ko banyak nan cadiak buruak. Taimpik di ateh, takuruang nak di lua. Katiko diagiah kasampatan ka inyo, indak dipagunoan. Tapi wakatu urang lain nio maju diha lang-halangi. Den yakin, saandainyo taksi-taksi bulu bir tu masuak ka siko, bisa coga bantuak kampuang awak dek nyo mah. Nan pasti se awak nan mampagunokan taksi bisa maraso nyaman. Maklum, pangusaha tu pro fesional dalam mangalola taksi,” baitu kato Mak Pono. “Indak bulu bir doh Mak, tapi blu bir,” potong Udin Kuriak. “Iyo itu mukasuik den. Salah-salah saketek tu kan biaso. Kan iyo baitu ndak Tan?” Baleh Mak Pono mintak pandapek ka konco palangkinnyo. “Indak saluruh salah saketek nan bisa bebas doh Mak. Mamaraf surek se bisa samo hukumannyo jo nan manarimo pitihnyo. Nan Mamak sabuik tadi tu namo, indak bisa sumbarang sabuik se doh. Umpamonyo Mak Pono adolah surang niniak mamak di kampuangnyo, ambo katoan Mak Pono tu surang niniak ngangak, lai ka bisa Mamak manarimonyo?” Baitu kato Tan Baro. “Iyolah, den salah. Kini baa mustinyo taksi nan labiah saribu tu?” Mak Pono mambaliak-an masalah ka samulo. “Kalau manuruik den, guluang selah. Indak usah diancam-ancam. Indak ka talok dek pangusaha taksi di nagari ko manambah taksi sampai sabanyak itu doh. Kini, taksi nan indak layak jalan, jadian oto pribadi. Kok iyo ado investor atau pangusaha dari lua nan nio masuak ka nagari ko rancak ditarimo jo tangan tabukak. Saandainyo wak den pangurus Organda atau wak den nan manjadi angku palo di siko, indak tamuek jo tapak tangan, katidiang den tampuangkan mah,” kecek Angah Piyan. “Tapi kalau ditarimo taksi-taksi baru tu, tantu taniayo taksi nan lah lamo ado di siko,” potong Kari. “Makonyo, taksi awak ko harus dikelola pulo sacaro profesional. Namonyo taksi ijan disamoan se jo angkutan kota. Taksi harus nyaman ditumpangi urang. Asenyo harus iduik, argometernyo juo musti iduik, oto jan baun rokok, palayanan musti ramah dan ijan pakai mogok gai di jalan,” kato Tan Baro. “Den juo satuju pandapek Angah. Kalau memang pangusaha taksi awak indak bisa maubah palayanan dan indak mampu manambah armadanyo, yo guluang selah lai. Tarimo pangusaha baru, abih pakaro,” kato Udin. Tamanuang Kari dibueknyo. (eSPe St.Soeleman)