Salah Induak Samang-Palanta

‘Banyak Pejabat tak Menguasai Tugas’. Dari sakian banyak barita nan ado di koran ‘Singgalang’, itulah nan manjadi bahan ota di lapau Uwo Pulin pagi kapatang. Memang kalau masalah pajabaik pasti manjadi paratian dek komunitas lapau tu. Baa ka indak? Urang-urang tu manilai pajabaik atau pagawai tu sabana dimanjo dek pamarentah. Jadi wajar sajo kalau masalah-masalah nan manjadi bahan barita di koran dijadian pulo ota dek urang-urang di lapau Uwo. “Kalau banyak pajabaik indak manguasoi tugas jo karajonyo tantu makan gaji buto se namonyo,” baitu kato Tacin Barain. “Indak salah pajabaik tu doh Cin!” Sorak Angah Piyan. “Baa indak dek Angah?” Tanyo Tacin. “Satau den, nan malatak-an inyo di jabatan tu adolah atasannyo. Kalau pajabaik di kabupaten, atasannyo tantu bupati. Kalau pajabaik di kota, atasannyo walikota. Pagabaik di provinsi lah pasti atasannyo gubenur. Nah, lah jaleh urang ko sarjana hukum, tapi diagiah jabatan kapalo dinas patanian umpamonyo, tantu indak masuak. Pastilah pajabaik tu binguang-binguang surang se di kurisi ampuaknyo. Atau lai bana turun ka lapangan sakadar malapehan rangkik-rangkik badan se,” baitu panjalasan Angah. “Jadi, kalau pajabaik indak manguasoi tugasnyo bisa jadi dek ulah kasalahan induak samangnyo mah yo Ri?” Tanyo Udin Kuriak. “Iyolah! Kan tadi lah den katoan, nan malatak-an urang tu di jabatan adolah atasannyo atau induak samangnyo. Makonyo paralu maagiah jabatan ka urang nan ahlinyo. Minimal jabatan nan diagiahan tu harus disasuaikan jo ilimu calon pajabaiknyo. Ijan karano si Anu kamanakan awak atau dunsanak kawan pak etek awak, diagiah jabatan rancak,” jawek Angah. “Batua mah Ngah. Manuruik ambo kagagalan pajabaik juo banyak dipangaruahi dek induak samang. Salain malatak-an pajabaik sumbarang se, juo ado faktor lain,” kato Tan Baro. “Mukasuiknyo?” Tanyo Udin. “Sabagai induak samang atau atasan, harusnyo maawasi karajo pajabaik nan manjadi anak buah awak. Tiok wakatu harus dievaluasi karajonyo. Kalau memang indak ado nampak kamajuan, harusnyo diambiak tindakan capek. Kalau paralu adoan mutasi dan pindahan ka jabatan lain nan sasuai jo kamampuan sarato ilimunyo. Kalau dipabiakan sajo, mako itulah jadinyo. Banyak program karajo indak jalan. Pajabaik banyak binguang. Sudah tu manggaya ilia-mudiak jo oto plat merah,” baitu panjalasan Tan Baro nan disambuik jo angguak dek Udin sarato Angah. “Iyo mungkin itu panyabab banyaknyo pajabaik indak manguasoi tugas ndak Tan?” Mak Pono lah sato pulo. “Tapi nan manguasoi pitih kan banyak!” Sorak Kari Garejoh. “Nan manguasoi pitih tu biasonyo bendaharawan mah Ri!” Potong Angah. “Biasonyo iyo, tapi atasannyo kan labiah bakuaso pulo daripado bendaharawan tu lai. Indak ka talok maindak-an kalau atasan mintak pintih doh. Yakinlah!” kato Kari baliak. Baitulah ota di lapau Uwo Pulin kapatang. Karano matoari lah samakin tinggi juo, urang-urang tu pun bubas untuak pai ka tampek karajo. (eSPe St.Soeleman)