Suok Kida-Palanta

“Ooh....ruponyo ado lo pagawai ko nan coki duo nokang yo Mak. Suok kida mainnyo,” kato Udin Kuriak ka Mak Pono nan duduak basabalahan di lapau Uwo Pulin. Mak Pono indak mangarati apo mukasuik Udin mangecek bantuak itu. Namun nan pasti sajo, coki duo nokang itu adolah istilah urang main koa atau main remi. “Mukasuik Udin?” Tanyo Mak Pono. “Kecek koran ko ado pagawai nan manarimo gaji ganda. Aratinyo suok kida mainnyo,” jawek Udin. “Kalau inyo hebat, biaso se tu nyo. Umpamonyo salain manarimo gaji manjadi pagawai, juo manarimo gaji manjadi guru mangaji di musajik,” kato Mak Pono. Eee....., kalau bantuak itu indak masalah doh. Banyak nan sarupo itu mah. Inyo pagawai, tapi jadi wartawan. Atau inyo pagawai tapi manjadi katua er-we, katua er-te bagai. Salain ado gaji pagawai, juo ado pandapatan dari karajo lain tu. Masalahnyo kini indak bantuak itu doh. Inyo manarimo gaji dari duo lembaga atau duo bidang nan samo-samo pagawai. Di instansi A inyo narimo, tapi di instansi B juo narimo gaji,” Udin manjalehan ka Mak Pono. “Kalau bantuak itu, administrasi nan indak duduak atau induak samangnyo nan engak mah,” tadanga suaro Kari Garejoh. “Ma pulo bisa bantuak itu?” Potong Uncu Labai. “Justru itu, kini pagawai nan manarimo gaji ganda tu disuruah mamulangan baliak gaji nan ciek lai tu saluruhnyo. Malah, bisa-bisa ado hu-kuman untuak inyo,” kecek Udin. “Jadi memang ado yo Din pagawai nan makan suok kida tu?” Tanyo Uncu. “Dulu pernah pulo pagawai nan manjadi anggota dewan di siko. Ado babarapo bulan inyo manarimo gaji ganda bantuak itu mah. Salain manarimo gaji anggota dewan, juo manarimo gaji pagawainyo. Tapi untuang lai capek salasainyo,” kato Angah Piyan. “Kalau manuruik den, itu bukti administrasi nan kurang jalan. Kalau memang ado pagawai pindah antar instansi atau antar lembaga, harusnyo administrasinyo barasiah, sahinggo indak ado kajadian manarimo gaji suok kida doh. Kalau bantuak iko kajadiannyo kan marugian negara namonyo. Baa dek Tan Baro?” kecek Kari sambia mintak pandapek ka konco palangkinnyo. “Batua mah. Administrasi tu manjadi tonggak utamo dalam sagalo urusan. Apolai kalau manyangkuik pitih-pitih. Kalau di lapau Uwo ko namonyo pambukuan. Jaleh sia nan bautang dan sia pulo nan lah mambayianyo,” jawek Tan Baro mancaliak jo suduik mato ka arah Ajo Tondeh. “Baa kok ka den bana caliak Tan Baro? Mantang-mantang utang den masih banyak di lapau ko yeh?” Hanyo itu nan dikatoan Ajo. “Paraso bana Ajo mah. Indak elok doh. Biaso se bautang tu nyo. Ijankan Ajo, negara se banyak utangnyo,” baleh Tan Baro. Baitulah ota di lapau Uwo pagi kapatang. (eSPe St.Soeleman)