Pambunuah Nomor Satu-palanta

Kecek koran ‘Singgalang’ hari kapatang, jalan raya manjadi pambunuah nomor satu di nagari ko. Bayangkan, salamo Januari sampai Juni atau hanyo dalam jarak wakatu anam bulan, 348 urang maningga di jalan raya. Urang-urang di lapau Uwo Pulin yakin, angko sabanyak itu hanyo nan tacatat di polisi sajo. Dalam kacalakaan bisa se ado nan indak dikatahui dek polisi atau cukuik badamai di jalan. “Kalau dibaco barita ko, ngari wak jadinyo. Indak nio awak mambalian anak kandaraan doh,” kato Angah Piyan ka konco-konconyo nan samo duduak minum kopi pagi kapatang di lapau Uwo Pulin. “Zaman kini mambali motor lah samo jo awak pai minum pagi ka lapau Uwo ko nampak di den,” kato Udin Kuriak. “Baa kok samo?” Lansuang se Uwo Pulin batanyo. “Bapitih atau indak, nan minum dapek juo,” jawek Udin. “Batua mah Wo. Kok didanga-danga se harago motor memang maha. Sampai limo baleh juta. Bahkan ado motor nan haragonyo di ateh tigo puluah juta. Tapi dek ado kamudahan karidik, jo pitih sajuta se lah bisa mamakai motor. Jadi, ikolah nan manyababkan motor di nagari ko bantuak samuik di jambu,” kato Tan Baro. “Den juo heran. Satiok pulang kampuang, ado agak sapuluah oto prah tronton tu mambao sepeda motor batamu di den. Isi ciek oto prah tu saindak-indaknyo ado agak ampek puluah motor. Kalau sapuluah oto banyaknyo lah samo jo ampek ratuih motor sakali masuak ka nagari awak. Itu baru ciek merek Tan. Saandainyo ado tigo merek se nan rutin masuak ka siko, sakali masuak tu lah saribu duo ratuih. Bayangkan saandainyo sapakan ado agak duo atau tigo trip. Bayangkan pulo sabulan. Yo sabana ribuan tambahan motor tiok pakan. Baa indak ka macet jalan deknyo dan baa pulo indak ka banyak kacalakaan nan kasudahannyo dibayia jo nyawa,” Mak Pono nan dari tadi cuma mandanga sajo lah sato pulo mangaluakan pandapeknyo. “Itulah awak. Dek sayang ka anak, dibalikan motor. Tau-taunyo itu pulo nan manjadi masin pambunuah,” kato Udin. “Di jalan raya tu, kalau indak awak maantak urang, urang maantak awak,” kecek Angah. “Jadi, pakaro antak-maantak di jalan raya lah biaso mah yo Ngah?” Tanyo Kari Garejoh. “Yo, itulah kanyataannyo. Makonyo banyak nan maningga di jalan. Bak kecek tadi, kalau awak etong se nan 348 maningga salamo anam bulan tu, aratinyo 58 urang maningga sabulan. Itu kan samo jo duo urang sahari. Alun tamasuak nan indak diurus polisi tu doh lai, Ri,” kato Angah baliak manjalehan. “Makonyo agiah pangaratian ka anak-anak jo kamanakan awak supayo bahati-hati mambao kandaraan atau bajalan di jalan raya. Nyawa tu murah kini. Bak kecek Angah tadi, kalau indak awak maantak, yo diantak urang. Ciek lai, saandainyo masih bisa anak-anak awak diajak kompromi, ijanlah dibalian inyo motor,” Uncu Labai indak pulo amuah katinggalan. “Eyayay, Ncu. Kalau indak dibalian motor, banyak pulo anak-anak tu nan malawan ka mande-bapaknyo. Atau minimal dibaenyo lari dari rumah. Karano inyo tau, depe motor tu murah,” potong Udin. Baitulah ota di lapau Uwo Pulin pagi kapatang. Ota tu bamulo dari barita nan bajudul ‘Jalan Raya Pembunuh Nomor Satu’. (eSPe St.Soeleman)