Pasan Maisok Pitih-Palanta

“Patuiklah pulsa hen pon anak den tiok sabanta se abih. Dibali kini, bisuak lah abih. Padohal inyo indak banyak manalepon doh. Binatang ko malah kironyo nan maisoknyo.” Angah Piyan lah baturo-turo pulo di lapau Uwo Pulin. Indak biaso-biasonyo Angah mambirunguik sarupo itu, tanyato barita ‘Singgalang’ juo nan manjadi panyababnyo. Di koran ‘Singgalang’ kapatang memang ado barita nan bakaitan jo pulsa henpon. Judulnyo: ‘Awas, SMS Sedot Pulsa’. Dalam barita tu dikatoan ado nomor-nomor nan dikirim antah dari ma-ma se, tanyato maisok pulsa henpon. Biasonyo nomor nan masuak tu ampek angko. Asa masuak, pulsa nan manarimo bisa bakurang dibueknyo. “Makonyo, agiah tau ka anak-anak awak. Saandainyo ado pasan atau es-em-es nan pangirimnyo ampek angko, indak usah ditanggapi. Lansuang apuih se lah!” Tan Baro mancubo mananggapi apo nan dikatokan Angah. “Indak itu se doh Tan. Ado pulo es-em-es nan mangatokan awak manang undian atau baruntuang bagai,” potong Tacin Barain. “Kalau nan sarupo itu panipuan mah Cin. Biasonyo tukang kirim dari nomor biaso-biaso se, tapi awak disuruah mahubuangi nomor-nomor tatantu. Di siko kadang balaku juo ilimu pukau. Kadang awak nan manarimo disuruahnyo mangirim pitih ka nomor rekening dan awak dituntun sampai ka a-te-em bagai. Beko indak disadari se, lah baragiah pitih banyak se awak ka urang nan indak dikenal. Maklum, arok dek hadiah gadang mah,” baleh Tan Baro. “Babagai caro urang manipu mancari pitih kini yo Tan?” Salo Mak Pono. “Itulah Mak, samakin maju ilimu pangatahuan jo teknologi, caro urang jaek juo samakin maju pulo. Kalau dulu tukang kicuah musti baadok-adok-an jo calon korbannyo, tapi kini indak. Ciek di Barat, ciek lai di Timur. Ciek di Jawa, ciek lai di Piaman, bisa dikicuahnyo. Jadi awak musti hati-hati,” jawek Tan Baro. “Kok dulu, tukang cacak nan banyak di tangah balai,” sorak Udin Kuriak. “Kini ma juo ado tukang cacak lai. Paliang-paliang nan ado tu tukang jambret dan itu mamakai kandaraan,” kato Tan Baro baliak. “Yo indak tabayangkan dek awak salamo ko kalau kajahatan juo bisa dilakukan jarak jauah. Indak mangecek jarak jauah se nan bisa doh, tapi marampok jarak jauah juo bisa. Den raso iko payah mancari palakunyo mah ndak Tan?” Tanyo Angah baliak. “Itulah makonyo awak harus hati-hati bana. Ijan pernah takijau dek pasan-pasan di henpon nan mangatokan awak dapek hadiah atau awak baruntuang. Rato-rato itu adolah panipuan. Atau minimal bantuak carito koran ko ha. Ado pasan dari nomor ampek angko, ijan sampai dibaleh. Kalau ado nan masuak ka henpon awak, lansuang apuih se lah. Indak paralu doh. Itu nomor maisok pitih mah,” Tan Baro manjalehan baliak. “Batua mah. Kadang anak-anak awak mambali pulsa jo siso balanjo, tapi dek nomor nan maisok pulsa tu, tapaso inyo mamintak pitih tiok sabanta. Kalau lai kayo urang gaeknyo indak masalah bana, tapi kalau kaidupannyo pas-pasan se, tantu manjadi masalah jadinyo. Kan kini henpon indak barang mewah lai doh mah. Siapo sajo bisa mambali henpon. Jadi, saandainyo manimpo urang bansaik, tantu batambah pamikirannyo. Salain mamikian untuak ka dimakan, harus pulo bapikia pambali pulsa,” Uncu Labai indak katinggalan pulo mangaluakan pandapeknyo. (eSPe St.Soeleman)