Batanak Seminar-Palanta

‘Masalah Pengangguran Diseminarkan.’ Itulah ciek barita ketek nan manjadi paratian Angah Piyan katiko mambaliak-baliak surek kaba ‘Singgalang’ pagi kapatang di lapau Uwo Pulin. Dalam pangana Angah, pangangguran di nagari ko indak cukuik kalau hanyo diseminarkan. Pangangguran tu paralu solusi. Paralu dicarian lapangan karajo, supayo jumlah pangangguran tu bakurang. Sapangatahuan Angah, sajak dulu indak taetong kalinyo seminar bakaitan jo pangangguran. Ado nan di hotel babintang, ado di kantua-kantua pamarentah mulai dari tingkek kabupaten atau kota sampai ka tingkek pusat di Jakarta. Sabaliaknyo, kalau dicaliak jo mato kapalo surang, jumlah pangangguran tamasuak galandangan samakin banyak. Dek ulah pangangguran pulo angko kajahatan samakin maningkek. Ado nan marampok jo mambunuah. Nan paliang ringannyo manjadi tukang cacak di tangah balai. “Seminar ka seminar. Lai bisa ditanak seminar tu?” Baitu kato nan malompek dari muncuang Angah. “Nan bisa ditanak tu bareh Ngah. Alun ado di nagari laweh ko urang batanak seminar doh. Jankan batanak seminar, batanak aia atau batanak padi se alun ado tadanga sampai kini lai doh,” kato-kato Angah disanggah dek Mak Pono. “Dek itulah den katoan, masalah pangangguran indak ka salasai jo seminar doh. Pangangguran tu tajadi kan karano lapangan karajo indak tasadio. Karano masalahnyo adolah lapangan karajo, mako pamarentah harus maagiah atau manyadiokan lapangan karajo,” kecek Angah. “Tapi, urang-urang nan manjadi nara sumber bisa batanak banyak sampai di rumah Ngah. Sakali manjadi nara sumber tu bisa samo nilainyo jo sabulan karajo batukang dek awak,” potong Kari Garejoh. “Itu aratinyo nan kanyang juo diagiah makan. Urang nan lah bakarajo juo mandapek tambahan pandapatan,” kato Mak Pono. “Satuju!” Tadanga sorak Udin Kuriak. “Apo ko ha, satuju-satuju se. Indak jaleh ujuang pangkanyo tibo-tibo basorak satuju,” kato Kari. “Satuju den jo istilah Angah tadi,” jawek Udin. “Istilah nan ma?” Tanyo Kari. “Batanak seminar. He...he....,” kato Udin baliak. “Sumbaghang mangecek je. Ughang lah sampai ka Piaman, awak di Pasa Usang juo lai,” kato Ajo Tondeh. “Jadihlah. Ciek lai den satuju, pangangguran harus dicarikan solusi jo lapangan karajo. Indak bisa kalau hanyo pakai seminar-seminar se doh. Kalau acok seminar, nan lah kanyang juo nan makan. Baa jo pandapek nan kini?” Baleh Udin sambia mancaliak ka Ajo. “Kok itu baru santiang Udin namoe. Lah sapandapek awak di lapau ko mah,” hanyo itu nan bisa dikatokan Ajo. “Tapi kalau indak pulo ado seminar, tantu indak jalan anggaran pamarentah. Kalau itu itu indak jalan, indak pulo ado proyek urang-urang tatantu. Di nagari ko, samakin banyak masalah, samakin acok lo seminar. Di seminar tu nampak urang-urang hebat. Samakin banyak urang hebat, samakin banyak pulo nan sagan. Kini diundang, bisuak diundang lo liak untuak manjadi nara sumber. Pakan muko apak tu juo liak di tampek babeda. Pokoknyo sampai kanyang, sampai muntah dek makan honor seminar,” tibo-tibo tadanga suaro Tan Baro nan dari tadi asik se mambaco koran. Angah Piyan, Mak Pono, Udin Kuriak sarato lainnyo nampak maangguak-angguak sarupo balam tigo gayo. Antah angguak lai mangarati atau hanyo sakadar manyanangan hati Tan Baro se, indak pulo jaleh doh. (eSPe St.Soeleman)

(Singgalang)