Jalan Saarah-Palanta

“Kalau bisa nan iko jan cuma rancana se. Harus capek dibuktikan,” kato Udin Kuriak. “Apo juo lai Din. Pagi-pagi lah mambirunguik surang, bantuak anak kuciang kadinginan,” kato Mak Pono. “Iko lah ado pulo rancana di kota ko mambuek jalan saarah. Kalau pandapek den harus capek dibuktikan. Ijan hanyo rancana ka rancana se. Karano sajak dulu di siko cuma banyak rancana, tapi indak banyak nan manjadi nyato,” jawek Udin. “Oh jalan saarah. Kalau pandapek den memang lah patuik bana ado jalan saarah di siko supayo indak banyak macet. Di antaro panyabab macet tu kan adonyo kandaraan nan babelok sumbarangan. Nah, kalau lah saarah jalan kan indak ka ado lai nan babelok sumbarang se,” kato Mak Pono mandukuang pandapek Udin. “Tapi jan jalan saarah bantuak di Pemuda,” potong Tan Baro. “Di Pemuda tu baa Tan?” Tanyo Mak Pono. “Di situ lai saarah jalannyo, tapi labiah gadang pulo untuak tampek parkir daripado untuak jalan. Kasudahannyo kan jalan itu macet juo, tarutama patang-patang hari atau di hari-hari libur. Karano, jalan tu lah labiah saparo dipakai untuak tampek parkir,” jawek Tan Baro. “Kalau baitu sakalian dibuek aturan malarang parkir di sapanjang jalan. Kalau masih ado nan parkir, otonyo harus diderek ka kantua polisi. Buek aturan bantuak di Jakarta tu ha,” baleh Mak Pono. “Indak ka bisa dibuek bantuak aturan di Jawa tu doh Mak. Urang awak ko banyak nan bailimu basi. Walau diderek bana hukumannyo, nan parkir di jalan akan ado juonyo. Buliah samo-samo mancaliak awak ka muko,” Kari Garejoh lah sato pulo mangaluakan pandapeknyo. “Kalau indak dicubo, indak ka bisa-bisa patuah awak di siko doh. Picayolah!” sambuang Mak Pono. “Batua juo kecek Mak Pono tu mah. Kalau bisa adonyo jalan saarah di kota ko diiriangi pulo jo aturan larangan parkir di sapanjang jalan. Untuak itu, patugas polisi jo patugas dinas parubuangan harus bagurila tiok hari mamantau suasana jalan. Kalau basuo kandaraan parkir di tapi jalan, agiah nasehat dulu supirnyo atau urang punyonyo. Tigo kali masih mamarkir kandaraan di jalan, derek se lai ka kantua polisi,” kato Tan Baro baliak. “Iyo lai ka bisa?” Potong Tacin Barain ragu. “Makonyo harus dimulai dan dicubo Cin. Kalau awak bandiangkan jo kota-kota lain, jauah tatingga mode lalu lintas di siko. Di kota-kota lain rato-rato jalan utamo atau jalan protokolnyo saarah. Di awak, sudahlah indak saarah, saluruh kandaraan masuak di jalan utamo. Mulai dari oto prah, bus, kandaraan pribadi sampai bemo jo bendi gai. Harusnyo kan ado pulo pambatasan jalan-jalan tatantu. Umpamonyo kandaraan tradisional atau kandaraan roda tigo dilarang malinteh,” kato Tan Baro. “Di siko lai ado larangan bantuak itu. Kalau indak salah Jalan Sudirman tu dilarang untuak bendi mah,” kecek Udin. “Tapi kanyataannyo masuak juo kan? Jadi mustinyo lalu lintas dan jalan-jalan di kota ko ditata elok-elok supayo nampak rancak,” baitu kecek Tan Baro. (eSPe St.Soeleman)