Karatau Madang di Ulu

Kudun barancana untuak marantau ka Jawa sasudah rayo bisuak. Niaik bantuak itu lah lamo talinteh di pikirannyo, karano marasoan iduik di Padang samakin sulik. Dalam pangana Kudun, kalaupun malang bana iduik di rantau, lai indak nampak di incek mato dunsanak dan urang kampuang doh. Sakalipun harus manjadi tukang tumbok ban atau manggaleh kapua baruih di tangah balai, indak ka jadi buah bibia dek urang kampuang. Pernah rancana bantuak itu dikatoan ka kawan-kawannyo dulu, tapi matah jadinyo. Karano, kawan-kawannyo indak nio Kudun taniayo dan manjadi galandangan di nagari urang lantaran indak ado kapandaian nan bisa diandalkan, mako Kudun alun jadi pai. Kini rancana untuak marantau tu, timbua baliak, gara-gara ado barita di koran ‘Singgalang’ nan mangatokan akan ado anggaran untuak parantau nan gagal. Dalam pangana Kudun sasudah mambaco barita tu, saandainyo indak ado untuang di rantau, masih bisa pulang. Karano lai ado anggaran dari pamarentah. “Mungkin iyo pai juo den ka Jawa sasudah rayo bisuak Ngah!” kato Kudun ka Angah Piyan nan duduak basabalahan. “Alah bapikia-pikia bana Kudun? Apo nan ka Kudun karajoan di parantauan? Ka manggaleh, apo lai ado modal? Karajo di kantua atau parusahaan, badan lah baransua tuo juo. Atau ka manyupir, apo ko lai pandai mambao oto? Kok ka manjadi tukang ojek atau batukang, rancaklah di siko. Kok luntang lantuang nan bedo di nagari urang,” baitu Angah maagiah pangaratian ka konco palangkinnyo. “Taragak lo nak manuka-nuka padok Ngah. Alah bak pantun kito juo, karantau madang di ulu, babuah babungo balun. Ka rantau Kudun daulu, di rumah bapitih balun. Kok nyampang buruak disabuik, tatampuah di nan malang wak den indak bakarajo, mungkin masih bisa pulang ka mari. Bacolah iko dek Angah, pamarentah maraso paralu maanggarkan pitih untuak parantau-parantau nan gagal. Jadi, saandainyo memang den indak barasil beko, tingga malapor se lai ka pamarentah,” baitu panjalasan Kudun. “Kok lai bantuak iko rancak mah. Bisa tambah banyak urang awak nan pai marantau,” potong Udin Kuriak. “Tapi nan ka pulang kosong ka kampuang juo banyak Din. Salamo ko urang-urang nan gagal tu kan taambek pulang kampuang dek ulah indak ado ongkos. Kini lah ado jaminan ongkos dari pamarentah tantu gampang se pulang lai,” kecek Tan Baro. “Ikolah bedanyo urang marantau saisuak jo kini. Dulu pai marantau batua-batua basabuang angok. Hanyo modal pakaian sapatagak sajo pai marantau. Kini urang marantau mambao baka, ado pakaian sakopor, pitih bajuta-juta. Malah kalau buruak untuang di rantau, lah turun tangan pulo pamarentah,” kecek Angah Piyan. “Karatau madang di ulu, Disiang mako babuah. Ka rantaulah Kudun daulu, bisuak pulang diagiah biaya dek pamarentah,” manyolang pulo Uncu Labai pakai pantun nan dikarang surang. “Itu namonyo parantau manjo mah Ncu!” Sorak Mak Pono. “Bisuak-bisuak ko, sia nan ka pai marantau, buek proposal dulu, buliah dibantu dek pamarentah,” potong Kari Garejoh. (eSPe St.Soeleman)