Mamanggok -Palanta

“Ruponyo indak paja-paja kaciek se nan mamanggok doh yo Ngah. Urang gadang sampai pajabaik negara juo ado nan mamanggok,” baitu kato Mak Pono nan ditujukan ka Angah Piyan. Kabatulan Angah duduak baadok-adok-an jo Mak Pono di palanta lapau Uwo Pulin pagi kapatang. Mandanga itu, Angah cuma galak sengeang se. Karano, inyo lah tau apo nan dimukasuik dek konco palangkinnyo tu. “Mamanggok itu sipaik manusia mah Mak. Siapo sajo punyo sipaik itu. Barangkali Mamak pernah mamanggok ka urang rumah gara-gara masalah sapele. Atau, bisa sajo di antaro awak ko pernah mamanggok jo induak bareh. Cuma sajo caro manggok tu babeda-beda. Ado nan lari dari rumah ka rumah urang tuo, ado nan lai di rumah se, tapi lalok pisah kamar jo induak bareh. Jadi, den raso manusiawi se tu nyo,” hanyo itu tanggapan Angah. “Tapi kalau mamanggok nan baakibaik ka masalah kalanjutan negara ko baa?” Tanyo Mak Pono. “Den lah mangarati kama mukasuik Mamak mah. Alun balikek di den lah bakalam. Takilek ikan dalam aia, lah tantu jantan batinonyo. Manuruik pandapek den pribadi, kalau pak dewan tu mamanggok gara-gara ado babarapo urang nan ka dipareso dek ka-pe-ka, den raso kurang dewasa sikapnyo mah. Bak kecek isi barita hari kapatang, itu co anak-anak,” baleh Angah. “Makonyo bisuak-bisuak ko, caliak-caliak bana urang nan ka dipiliah manjadi wakia di parlemen. Partamo ijan nan cangok ka pitih, sudah tu jan nan pamanggok dan nan ka tigo harus mangarati jo tugas-tugasnyo,” manyalo Tan Baro. “Kok nan pamanggok tu di rumah se lah ndak Tan! Sagan awak jo anak ketek-ketek,” kecek Kari Garejoh. “Baa kok sagan jo anak-anak ketek Ri?” Tanyo Udin Kuriak. “Yo, mamanggok tu kan lahan anak ketek, tapi dek awak nan lah punyo pangkaik diambiak lo,” jawek Kari. “Atau wak buek se lomba mamanggok baa?” Tanyo Tacin Barain. “Ha....ha....., indak den doh. Ado-ado se ide Tacin mah,” potong Angah. Baitulah ota di lapau Uwo Pulin pagi kapatang. Karano hari Akaik dan urang-urang tu indak karajo, mako kasempatan itu dipakai untuak balamo-lamo di lapau. Salain ota soal mamanggok, juo ado ota pak mantari dari Malaysia nan santiang babahaso Minang. Ruponyo apak tu katurunan Luak Agam, tapi lah turun tamurun di Malaysia. Beda jo urang kampuang Mak Pono, baru duo tahun di Jawa, indak pandai se bahaso Minang lai. Kalaupun masih bisa bahaso Minang, logatnyo lah batuka jo logat Jawa atau logat Batawi. (eSPe St.Soeleman)