Samba Randang-PalantaLapau

Dalam sapakan ko koran ‘Singgalang’ ampia ndak baranti mambaritakan randang Padang nan manjadi makanan nomor satu di dunia. Tantu sajo barita-barita bantuak itu manjadi kabanggaan dek urang Minang. Baitu juo dek komunitas lapau Uwo Pulin. Cuma sajo, pagi kapatang ado raso ibo di hati urang-urang tu. Karano, dibaritakan baraso samba randang tu dijua dek urang Malaysia di Balando. “Awak nan punyo, urang nan buliah. Baa caritonyo ko Tan?” Baitu tanyo Angah Piyan ka Tan Baro katiko samo-samo minum pagi di lapau Uwo, kapatang. “Apo juo lai Ngah?” Tanyo Tan Baro. “Iko ha, samba randang awak ko dijua urang Malaysia di Balando. Itu kan samo se, awak nan punyo tapi urang nan buliah,” jawek Angah. “Tu baa juo lai. Awak cuma bisa manggalehnyo di nagari surang. Bangga bana awak nan punyo namo, tapi urang nan maambiak buahnyo. Atau Angah bisa manggalehnyo ka lua nagari ndak?” Baitu jawek Tan Baro sambia batanyo baliak. “Jo apo pulo dimodali pai manggaleh ka lua nagari tu. Kan indak mungkin pulo dibuek randang sakilo atau duo kilo dagiang, tu bajojo ka Amerika. Itu samo se tajua tabek untuak pambali anak ikan mah. Rancak dijua se di kampuang ko, banyak juo dapek pitih,” kato Angah. “Nah, itu masalahnyo. Sadangkan urang Malaysia tu punyo modal taba dan ambo sacaro pribadi indak mampamasalahkannyo doh, asa urang Malaysia tu lai maagiah merek randang Padang atau samba randang Minang bagai. Jo caro itu kan samakin mandunia namo nagari awak. Baa manuruik Mak Pono?” kecek Tan Baro. “Satuju! Awak indak buliah lo egois doh. Kalau memang awak indak sanggup, bialah urang nan manggalehnyo, tapi jan dibuek pulo namo randang Malaysia. Harus ditulihan di situ ‘randang Padang’. Kalau paralu randang Solok, randang Sangka, randang Kik Tenggi, randang Pikumbuah atau randang Padang Panjang bagai,” hanyo itu tanggapan Mak Pono. “Ep, jan lupo randang Piaman!” Sorak Ajo Tondeh. “Ajo cukuik mampromosian sala lawuak se. Harus manjadi produk khas pulo itu. Uruslah hak patennyo lai. Baitu juo sanjai Bukik Tinggi, galamai Pikumbuah, bareh Solok, paragede Padang Panjang, rakik rinuak atau abuih pensi Maninjau, bilih Singkarak sarato banyak lai makanan khas daerah awak nan patuik dibuek-an hak patennyo, sahinggo indak dirampok pulo dek nagari lain,” Kari Gerejoh nan dari tadi anok se, lah sato pulo mangaluakan suaro. Baitulah suasana di lapau Uwo Pulin pagi kapatang. Intinyo, saluruh urang di lapau tu bangga jo samba randang nan manjadi makanan nomor satu di dunia. Padohal di kampuang-kampuang samba randang tu hanyolah untuak acara baralek atau untuak manjamu urang banyak di hari baiak bulan baiak. (eSPe St.Soeleman)