Baraja Malawan Jawi Bagak

“Iyo sero manjadi wakia rakyaik,” kato Udin Kuriak ka konco-konconyo nan samo duduak di lapau Uwo Pulin pagi kapatang. “Kalau indak sero manga pulo urang mati-matian untuk mandapek jabatan tu. Baa kok itu nan takana dek Udin?” Kato-kato Udin ditanggapi dek Angah Piyan. “Bisa jalan-jalan sampai ka lua nagari bagai. Iko ka pai ka Spanyol lo ha. Ka Spanyole katoe,” jawek Udin. “Namonyo se mawakili banyak rakyaik tantu pasti se rakyaik banyak pulo kapentiangannyo. Ado nan punyo kapentiangan ka Jawa, ado ka Batam, ka Medan dan tantu ado lo ka lua nagari. Nah sabagai urang nan mawakili harus siap satiok saat. Sabagai wakia rakyaik indak buliah mangecek an panek doh,” baitu tanggapan Angah. “Manga ka Spanyol Din?” Tanyo Mak Pono. “Kecek barita koran ‘Singgalang’ ko pai baraja mangalola rumah potong hewan,” jawek Udin. “Ha...ha...., kalau untuak mandabiah jawi manga ka Spanyol bana. Urang kampuang den banyak nan santiang mandabiah jawi mah. Kan lah tanamo ado nagari di kampuang den kabanyakan urang laki-lakinyo manjadi tukang dabiah. Indak di Padang se nyo mandabiah doh, sampai ka Pakanbaru dan ka Jakarta bagai,” baleh Mak Pono. “Indak baraja mandabiah jawi doh Mak, tapi baraja mangalola rumah potong,” Udin manjalehan. “Itu bahasa umumnyo, nan intinyo baraja mandabiah jawi jo masin. Tadi lah den baco baritanyo,” tibo-tibo Kari Garejoh manyalo. “Lai ndak pai baraja malawan jawi bagak Din? Satau den di Spanyol tu ado adu manusia jo bantiang,” tadanga pulo suaro Tacin Barain. “Mukasuik Tacin?” Tanyo Udin. “Mandabiah jawi tu kan ado resikonyo. Umpamonyo jawi bagak nan ka didabiah tantu malawan. Nah supayo bisa mangalahan jawi tu harus baraja dulu ka urang Spanyol,” jawek Tacin. “Ha...ha....ha...., bisa juo bantuak itu mah Cin. Di Spanyol tu memang banyak urang malawan jawi atau kabau bagak,” kato Kari. “Indak itu doh. Apak-apak tu baraja caro mangalola rumah potong, tamasuak caro mamakai pakakeh moderen nan didatangkan dari Spanyol. Kan lucu jadinyo beko, masin ado tapi caro mamakainyo ndak pandai,” kato Udin maluruihan baliak poandapek kawan-kawannyo tu. “Kalau ka baraja bantuak itu harusnyo calon operatornyo-lah disuruah ka situ. Baa mangko anggota dewan?” Mak Pono mulai kritis. “Yo ndak manyimak Mak Pono sajak tadi doh. Lah jaleh wakia rakyat tantu mawakili saluruh rakyaik. Nah sakali ko mawakili rakyaik nan baprofesi tukang dabiah jawi,” kato Angah. “He...he....iyo yo. Mudah-mudahan se rumah potong nan dibangun tu bisa dipakai sasuai harapan masyarakaik. Bisuak den malamar di situ manjadi tukang dabiah,” hanyo itu nan bisa dikatoan Mak Pono. “Baa Tan Baro anok se sajak tadi? Sakik gigi ko?” Kato Udin. “Ha....indak, ambo mambayangkan baa lah apak-apak tu baraja mandabiah jawi di Spanyol,” hanyo itu jawek Tan Baro sambia maambiak rokok sabatang, sudah tu dibakanyo. Tampaklah asok mangguluang. Matoari baransua tinggi juo. Urang-urang tu mulai kalua dari lapau untuak pulang ka rumahnyo dan sudah tu ka tampek karajo. (eSPe St. Soeleman)