Dek Ulah Salah Paham-Palanta

Tando-tando hari ka hujan nampak jaleh pagi kapatang. Langik agak itam, udaro taraso dingin. Di simpang jalan tampak anak sikola bakumpua mananti angkutan. Galak jo garah dari anak-anak sikola tu sakali-sakali tadanga sampai ka lapau Uwo. Biasolah, namonyo sajo anak-anak remaja tantu banyak garah jo kucindan. Di dalam lapau, suasananyo indak jauah beda dari hari-hari sabalunnyo. Satiok urang nan ado di situ barabuik nio mandapek koran ‘Singgalang’. “Sabanta Ngah. Itu baa kok sampai bacakak gai warga jo polisi?” Tanyo Udin Kuriak ka Angah Piyan nan kabatulan mandapek jatah halaman partamo. Di halaman partamo tu salain barita angek dari lua nagari nan mangatokan Kolonel Khadafi maningga dek ulah rakyaiknyo surang, juo ado barita nan mangatokan cakak banyak antaro masyarakaik jo polisi. Barita itulah nan ditanyoan dek Udin. “Oh, barita iko. Gara-gara razia sampai ka rumah-rumah panduduak, berang masyarakaik, mako tajadilah cakak,” jawek Angah manjalehan ka konco palangkinnyo tu. “Razia sampai ka rumah baa pulo?” Tanyo Udin heran. “Yo itu nan den baco tadi. Keceknyo di daerah tu banyak kandaraan indak basuku, sahinggo polisi harus mangaja sampai ka rumah panduduak. Tapi, panduduak indak manarimo caro-caro bantuak itu, dan tajadilah bakuampeh,” jawek Angah baliak. “Di situ memang banyak kandaraan indak basuku mah Ngah. Nan paliang banyak tu motor. Kabanyo motor-motor tu datang dari babagai daerah,” tibo-tibo tadanga suaro Tan Baro. “Indak basuku baa pulo? Apo suku kandaraan tu salamo ko? Caniago, Jambak, Malayu, Tanjuang atau suku Batak, Jawa, Bugih, Sunda, Madura?” Tanyo Tacin Barain. “Suku Japang!” Ajo Tondeh manjaweknyo. “Mukasuiknyo, kandaraan tu indak punyo surek-surek. Tando awak punyo kandaraan kan ado be-pe-ka-be jo es-te-en-ka. Nah, kini itu bana nan indak ado. Kalau kandaraan indak punyo surek-surek, kan samo se jo kandaraan bakeh maliang. Ikolah nan diraziai dek polisi,” Angah Piyan manjalehan. “Tapi baa kok sampai ka rumah-rumah panduduak? Daripado tangguang-tangguang rancak taruih se kaja sampai ka dalam biliak,” Tanyo Tacin. “Indak tau lo den doh. Tapi, bisa se karano urang punyo kandaraan tu lari sampai ka rumahnyo, tantu dikaja dek polisi. Atau memang polisi mancurigai rumah-rumah panduduak tu manyimpan kandaraan nan indak basurek-surek,” jawek Angah baliak. “Ambo raso kajadian tu dek ulah salah paham se tu nyo,” kato Tan Baro. “Ha...ha...., tantu iyo dek salah paham Tan. Kalau samo-samo sapaham antaro warga jo polisi indak ka tajadi tu doh,” semba Udin Kuriak. “Kajadian di Libia ko juo dek ulah salah paham mah. Lah ampek puluah taun kolonel ko mamimpin, indak sapaham jo rakyaiknyo doh. Nah, kini babayia utang. Baitu juo kajadian di Papua ko,” Kari Garejoh lah sato pulo basuaro sambia mampacaliak an barita-barita lain sasudah koran sampai di tangannyo dari Angah. (eSPe St.Soeleman)