Anggang Lalu, Atah Jatuh

[RB. KHATIB PAHLAWAN KAYO] Anggang lalu atah jatuah, anak rajo mati ditimponyo” iko kato-kato kiasan untuak kajadian nan manimpo sasaurang manjadi susah, sadangkan inyo indak sato manyato babuek katiko tu. Tapi dek tapek pado wakatu kajadian inyo barado ditampek, mako inyo indak dapek mailak, tapaso manyandang lamang angek, kabaa juo mambaia indak makan. itu namonyo nasib atou takadia nan indak dapek diilakkan. Kajadian sarupo tu waloupun jarang tasuo, tapi indak mustahia tajadi, baiak ditangan urang lain, atoupun pado diri kito sandiri. Baa kok baitu, karano nan namonyo iduik indak dapek ditantukan. Bajalan lah sabana baati-ati, lah diparetongkan sagalo sasuatu nan diparalukan, lah dirancanakan sangek matang, sainggo manuruik ukuran sacaro lahie indak ado lai nan katinggalan. Baitu pulo dalam malangkah sabana lah mancaliak suok kida, diliek jalan mandaki jo manurun, diparhatikan jalan balubang jo nan lanyah. Tapi kalou nan namonyo malang katumbuah, bisa tajadi katiko awak lalu longsor tibu, awak liwaik, jambatan putuih, atou awak sadang di tangah jalan batang kayu tumbang, tiang listirik patah, bisa juo papan merek dirabahkan angin. Di situlah lataknyo nasib dan takadia nan lah ditantukan Allah, manuruik suratan nan ado. Tapi nan dimukasuik jo anggang lalu atah jatuah, ado duo kamungkinan, partamo bisa juo sarupo kajadian di ateh, aratinyo kito batua-batua manjadi sasaran nan tibo-tibo, tapi indak dek kalalaian samo sakali. Nan kaduo, bisa dek awak kurang ati-ati, sato bamain api atou manari-nari di tapi lubang. Kalou iyo sarupo tu tantu indak mustahia bisa tabaka atou bisa jatuah masuak lubang. Sarupo jo anak mudo nan bakawan jo pajudi, waloupun indak sato bajudi tapi katiko ado razia polisi, inyo sato tatangkok dan maringkuak dalam tahanan, indak dapek mailak lai, karano inyo ado ditampek kajadian. Baitu juo anak gadih nan suko bakawan jo parampuan nakal. Lah jaleh ari malam, sato juo ilia mudik, bamain di tampek hiburan. Katiko tampek tu digaledah Satpol PP, tatangkok sagalo nan ado disitu, indak kacuali anak gadih tadi. Bantuak itu pulo anak sakolah nan babaju saragam pai ka internet pado jam palajaran, waloupun hanyo satu duo nan manonton situs-situs porno, nan lain ado nan indak sato, tapi katiko razia kasadonyo ditangkok polisi untuak dipareso. Contoh-contoh sarupo tu lah nan dimukasuik “Anggang lalu-Atah jatuah” nan disababkan dek karano kalalain atou dek karajo nan sio-sio. Mudah-mudahan manjadi paringatan dek anak kamanakan kito tarutamo nan ketek jolong gadang, supayo baati-ati untuak maso nan ka datang. Ingek katiko galak urang sato basamo, tapi kalau lah manangih ditangguang surang-surang. Semoga! (*)