Lah Duo Tahun-Palanta

Langik Kota Padang nampak tacilak. Matoari gagah dari baliak bukik. Urang-urang mulai ilia-mudiak mamacetkan jalan raya. Aroma parfum dari urang-urang nan ilia-mudiak barangkek karajo di jalan tabang basamo angin pagi. Di lapau Uwo Pulin, Tan Baro jo kawan-kawannyo duduak maota sambia minum kopi. Sarupo biaso, ota pastilah apo sajo nan sadang angek, atau minimal apo nan manjadi barita koran ‘Singgalang’. Maklum, koran urang awak tu lah batahun-tahun dilanggani dek Uwo Pulin. Itu pulolah salah satu daya tarik lapau tu. “Lah duo tahun pas jo hari ko mah yo Tan!” Kato Mak Pono nan sadang mambaliak-baliak koran. “Apo nan duo tahun Mak?” Tanyo Uncu Labai. “Gampo. Kan dulu gampo tajadi hari Rabaa tanggal tigo puluah September. Masih takana, wakatu itu awak baru pulang karajo dan basiap-siap ka Sumbayang Mugarik,” jawek Mak Pono. “Eh, iyo yo. Indak taraso se lah duo tahun sajak musibah itu. Tapi den caliak masih banyak masalah nan alun salasai, tarutamo masalah bantuan gampo. Kabanyo banyak protes dari warga nan musti manarimo, tapi indak manarimo. Sabaliaknyo nan indak patuik manarimo justru mandapek bantuan,” kato Uncu. “Iduik ko indak pernah lapeh dari masalah doh Ncu. Pasa nan jadi masalah kini tu kan korban gampo dek Uncu. Tapi den indak itu nan manjadi masalah doh,” baleh Angah Piyan. “Apo tu?” Tanyo Uncu. “Para ahli lah mangatoan nagari awak ko paliang rawan jo bancano, tapi sampai kini indak nampak usao sungguah-sungguah dari pamarentah untuak maantisipasi dampaknyo doh. Kalau memang nagari ko rawan, mustinyo kan ado pasiapan. Umpamonyo mandidik masyarakaik mulai dari anak sikola es-de sampai nan gaek-gaek, baa caro manyalamaikkan diri. Mustinyo itu kan masuak mato palajaran di rumah sikola. Nan kaduo pasiapan pambangunan fisik. Sampai kini caliaklah jalur evakuasi indak juo tuntas. Nan ka tigo, masih banyak urang mambangun di dakek pantai. Padohal itu dikatoan zona merah. Jadi, masih banyak masalah nampak di den. Baa pandapek Tan Baro?” Baitu tanggapan Angah Piyan sakalian mintak pandapek konco palangkinnyo “Batua mah. Sadapek mungkin paringatan kajadian gampo tu jan hanyo untuak sakadar banostalgia, tapi lakukanlah evaluasi untuak maambiak langkah-langkah ka muko. Apo-apo masalah salamo duo tahun ko, ijan sampai tajadi juo bisuak ko lai. Saandainyo masih banyak warga nan memang manjadi korban gampo tapi alun mandapek bantuan, mako sacapeknyolah dibantu. Kalau memang jalur evakuasi paliang dibutuhkan, yo harus dibangun,” hanyo itu pandapek Tan Baro. “Ado pandapek den ciek Tan. Kini jalan-jalan utamo manuju ka by pass lah banyak dipanuahi urang manggaleh. Den raso iko manjadi halangan beko saandainyo musibah itu datang. Bahkan, jalur evakuasi juo dipakai untuak parkir truk bagai. Jadi, parcuma se dibangun jalan manuju jalur hijau kalau indak bisa dipakai maksimal,” kato Udin Kuriak. “Urang mancari bareh mah Din!” Sorak Uwo Pulin. “Mancari bareh tu wajib, tapi ijan mangganggu kapentiangan umum,” baleh Udin. “Manga jalan manuju jalur hijau atau manuju by pass, di jalan muko rumah pak wali se banyak urang manggaleh. Baitu juo di muko rumah wakia walikota, macet dek parkir kandaraan. Indak ado nan barani mangosongkannyo doh,” kato Kari Garejoh. (eSPe St.Soeleman)