Lupo Sejarah-Palanta

Memang harus diakui, kini banyak anak-anak mudo nan lah lupo jo isi Sumpah Pemuda. Kalau pun ado nan lai takana, urutannyo indak sasuai jo aslinyo. Itulah nan manjadi ota di lapau Uwo Pulin pagi kapatang. Ota bamulo dari barita koran ‘Singgalang’ nan bajudul ‘Banyak tak Hafal Sumpah Pemuda’. Kondisi bantuak itu tantu babeda jo maso-maso dulu. Dulu, katiko angkatan Tan Baro basikola, saluruh nan bakaitan jo sejarah bangsa ko bisa diapa di lua kapalo. Mulai dari teks Proklamasi, Pancasila, Sumpah Pemuda sampai ka pembukaan Undang-Undang Dasar ampek limo, sabana apa di lua kapalo. Baitu juo namo-namo mantari dalam kabinet, indak ado nan lupo ciek juo. “Ikolah beda anak-anak mudo kini dibandiangkan jo awak sangkek dulu. Kini lah banyak nan indak tau jo sejarah. Bak kecek koran hari ko, banyak nan lupo jo Sumpah Pemuda,” kato Mak Pono ka konco-konconyo nan samo duduak di palanta lapau tu. “Batua Mak. Dulu awak bisa apa Pancasila, Proklamasi sapai pasal-pasal dari Undang-Undang Dasar ampek limo. Karano memang dipalajari di rumah sikola. Banyak palajaran nan mamungkinkan awak maingek sejarah. Salain memang ado di palajaran sejarah, juo ado palajaran pe-em-pe dan palajaran pe-es-pe-be. Wak den samaso es-de, apa namo-namo mantari kabinet di lua kapalo. Kini, cubolah tanyo sia mantari pandidikan ka anak sikola. Barangkali dari limo urang nan ditanyo mungkin hanyo surang jo baduo se nan tau. Padohal itu mantari nan maurus inyo bana salaku anak-anak sikola, kan?” Baitu kato Angah Piyan mananggapi apo nan dikatokan dek Mak Pono tadi. “Itulah pentiangnyo palajaran sejarah di nagari awak. Kalau palajaran itu indak ado, bisa-bisa beko anak-anak tu indak tau lai baa proses negara sampai bisa mardeka,” kato Tan Baro. “Kini yo bana prihatin wak jo kondisi generasi mudo. Banyak nan indak apa Pancasila. Padohal itu dasar negara,” kecek Mak Pono. “Manga generasi mudo dek Mamak, pajabaik se ado juo nan indak apa Pancasila,” manyalo pulo Kari Garejoh. “Kalau lai bisa awak mausul, ambo nio palajaran Pancasila tu diiduik-an baliak, salain palajaran sejarah. Kalau indak, bisa-bisa generasi bangsa ko indak tau lai jo sejarah pajalanan bangsanyo surang. Baa manuruik Angah?” Kato Tan Baro sambia mintak pandapek ka konco palangkinnyo. “Iyo Tan. Kalau sampai generasi bangsa ko lupo atau indak tau samo sakali jo sejarah negaranyo, itu kan mamalukan,” hanyo itu pandapek Angah. “Salain itu, juo paralu palajaran moral, supayo anak-anak negara ko bataratik. Kini, moral anak bangsa lah banyak nan di bawah tapak kaki. Kan lah samo wak caliak di tipi atau awak baco di koran. Malah, di muko mato kapalo awak surang, banyak anak-anak indak manaruah hormat atau indak maharagoi urang-urang nan labiah tuo darinyo lai. Lah samo data se sawah jo banda. Sawah indak bapamatang, ladang indak bapintalak dek nyo lai,” Uncu Labai indak pulo katinggalan mangaluakan pandapeknyo. (eSPe St.Soeleman)