Nan Indak Ado, Kini Alah Ado - Palanta

“Ilia banda mudiak banda, batungkek batang kamulau. Nan indak didanga alah didanga, koncek manjujuang tonggak lapau....” “Ha....ha......, lai pandai pulo Udin bapantun mah yo? Kalah pulo Uncu Labai dek Udin. Tapi takana di den apo mukasuiknyo tu?” Baitu kato Angah Piyan batanyo. “Indak ado apo-apo doh Ngah. Den cuma ibo hati se maikuti kajadian-kajadian salamo duo pakan ko. Pakan kapatang nagari ko diebohan dek panari talanjang bulek di kafe, sudah tu kini lah ado pulo anak-kamanakan awak nan ditangkok gara-gara diduga talibat teroris. Kan awak samo tau, salamo iduang ditampuah angok baru kini kajadian-kajadian bantuak itu ado di ranah Minang. Kan iyo baitu ndak Wo? Cubolah Uwo katoan, sabagai urang nan memang labiah tuo dari kami-kami ko, apo ado kajadian bantuak kapatang tu salamo ko?” Jawek Udin manjalehan sakaligus mintak pandapek ka Uwo Pulin. “Kok itu nan Udin tanyo iyo alun ado lai doh. Urang manari talanjang tu cuma ado di lua nagari. Tapi den raso indak pulo saparah nan tatangkok kapatang tu doh. Baitu juo anak-kamanakan Minang nan manjadi teroris salain nan ditangkok di kampuang Mak Pono kapatang tu, pernah tajadi babarapo tahun lapeh. Cuma sajo kamanakan nan surang tu maningga kanai bom di Jakarta dan inyo manatap di Bengkulu,” hanyo itu nan bisa dikatoan Uwo. “Itu tando e nagari awak lah samakin maju dan moderen mah Din!” Potong Ajo Tondeh. “Ha...ha...., maju jo moderen indak diukua jo tari talanjang bulek atau teroris doh Jo. Nan batilanjang bulek tu jawi, kambiang, kuciang, ciliang atau sakalian nan banamo hewanlah,” salo Angah. “Sabananyo anak-kamanakan awak ko banyak nan ondong aia ondong dadak. Dek ulah uru-uru samo gadang, disangko iyo elok, ruponyo ranjau. Di sikolah nampaknyo kalalaian dari awak salaku mande-bapak jo mamak. Di nagari ko kan ado pepatah nan mangatokan ‘anak dipangku, kamanakan dibimbiang, urang kampuang dipatenggangkan, jago adat jan binaso’. Kalau saluruh awak lai paduli jo anak-kamanakan, den raso kajadian-kajadian bantuak itu indak ka tajadi doh. Ciek lai, mamahami agamo ijan sakuduang-sakuduang. Agamo awak ko indak pernah maaja kakarasan doh. Agamo awak ko panuah jo lamah lambuik, kasiah sayang dan saliang maharagoi. Nah, kalau lah main bom, main bunuah nan katonyo bajihad, itu sasek aia atau salah pasang mah,” Uncu Labai indak pulo katinggalan maagiah pamahaman ka konco-konconyo. Baitulah suasana di lapau Uwo Pulin pagi kapatang. Urang-urang nan samo duduak di palanta lapau tu mangatoan nagari Minangkabau kini samakin lamo samakin hebat. Nan indak tasuo salamo ko lah tasuo. Nan indak pernah ado sajak dulu, kini alah ado. Tantu sajo sasuai jo pantun Udin Kuriak. (eSPe St.Soeleman)