Sabaleh, Sabaleh, Sabaleh-11 11 2011

“Lah banyak nan pasiek nampak di den!” Kato Uncu Labai sambia malatak-an koran ‘Singgalang’ di ateh meja. “Sia nan pasiek Ncu?” Tanyo Mak Pono. “Awak-awak ko lah banyak nan pasiek,” jawek Uncu. “Apo masalahnyo?” Tanyo Mak Pono baliak. Mako bacaritolah Uncu sasuai jo apo nan dibaconyo. Banyak urang nan baburu tanggal sabaleh, bulan sabaleh tahun duo ribu sabaleh ko untuak manikah dan baralek. Katonyo itu angko cantik dan malah ado pulo nan mangatokan tanggal tu mambao kabaruntuangan. “Itu bukan pasiek Ncu, tapi tapangaruah dek nomor-nomor henpon. Kan awak lah samo tau, anak-anak mudo bakaja-kaja mancari nomor cantik keceknyo. Ado nan angkonyo samo ampek buah, ado nan baurutan ka ateh, baurutan ka bawah, ado nan sasuai jo tanggal, bulan dan tahun lahianyo. Pokoknyo bamacam. Jadi manuruik den, dikajanyo tanggal sabaleh, bulan sabaleh, tahun duo ribu sabaleh hanyo untuak murah maingek hari basajarah se tu nyo,” kecek Angah Piyan pulo. “Batua pandapek Angah mah Ncu. Tahun bisuak pasti nan dikaja urang tu tanggal duo baleh, bulan duo baleh. Mari samo-samo mancaliak awak tahun muko,” kato Tan Baro. “Iyo Tan. Tahun kapatang urang banyak baralek jo manikah di tanggal sapuluah, bulan sapuluah. Inyo maanggap tanggal itu labiah murah maingek. Kalau soal paruntuangan atau jodoh den raso indak akan pernah bakaitan jo tanggal doh. Saluruh hari dan saluruh tanggal tu samo. Paruntuangan atau umua barumahtanggo tu tagantuang jo urang nan mambinanyo. Lai bana diambiak angko cantik untuak manikah jo baralek, kalau pasangan laki-bini di dalam rumahtanggo indak pandai mambinanyo, den raso indak ka batahan lamo doh. Sabaliaknyo, walau manikah atau baralek di tanggal sumbarang se, tapi pasangan di dalam rumahtanggo tu samo-samo pandai mambinanyo sasuai jo agamo, den raso rumahtanggonyo batahan lamo. Kan iyo bantuak itu ndak Ncu?” Kecek Udin Kuriak sakaligus mintak pandapek Uncu. “Iyo. Iduik barumahtanggo indak pernah tagantuang jo tanggal cantik atau indaknyo doh. Kuncinyo hati, agamo dan saliang mahormati, saliang maharagoi antaro laki jo bini,” hanyo itu jawek Uncu. “Kan lah den katoan tadi, dikajanyo tanggal sabaleh, bulan sabaleh di tahun duo ribu sabaleh bisuak ko untuak baralek atau manikah hanyo untuak murah maingeknyo dek pasangan tu jo kaluarganyo. Kan manikah adolah paristiwa paliang basejarah dalam iduik manusia. Jadi, wajar se kalau dicarian pulo hal-hal istimewa. Makonyo, ndak usah awak hubuang-hubuangkan pulo jo nan lain-lain. Manga itu, barangkali banyak pulo di antaro pasangan laki-bini nan punyo harapan supayo anaknyo lahia di tanggal sabaleh, bulan sabaleh bisuak. Lai takana dek Uncu tanggal sapuluah, bulan sapuluah tahun kapatang ado di antaro urang hamil nan rela dioperasi kandungannyo, walau maso malahiakan tingga tigo atau ampek hari lai. Sakali lai iko samato supayo gampang maingeknyo,” kecek Angah baliak. “Den tanggal sabaleh, bulan sabaleh bisuak ko ka batanam kopi di kampuang,” potong Mak Pono. “Den ka mambali kambiang,” sorak Tacin Barain. Baitulah ota di lapau Uwo Pulin pagi kapatang. Walau hujan turun samanjak subuah, namun indak maambek kabiasaan urang-urang tu untuak duduak maota di lapau. (eSPe St.Soeleman)