Palanta Lapau-Perai

Udaro kawasan Balai Baru taraso agak labiah angek dari pagi-pagi biasonyo. Langik nampak indak baawan, matoari basinar garang dari arah Timur. Di simpang jalan dakek lapau Uwo Pulin anak-anak sikola banyak manunggu angkutan kota. Sadangkan di jalan banyak kandaraan roda ampek jo roda duo samo-samo manuju arah pusat kota. Di antaro kandaraan roda duo, ado pulo nan sarupo urang dikaja setan. Kancang-kancang! Mancaliak anak sikola nan sadang manunggu angkutan kota tu, talinteh di kapalo Mak Pono baraso biaya pandidikan kini memang indak murah. Istilah gratis atau indak mambayia dari pamarentah hanyolah isapan ampu tangan sajo. Dalam kanyataan, banyak nan harus dibayia sasudah anak-anak ditarimo. Ibarat naiak oto dari Padang ka Solok, wakatu naiak di Simpang Haru memang perai. Tapi sampai di Padang Basi atau di Indaruang lah ado se sitokar nan mamintak pitih. “Lai batua nan di Padang Panjang ko, Tan?” Tanyo Uncu Labai nan kabatulan mambaco barita halaman partamo. “Baa tu?” Tan Baro baliak batanyo. “Di barita ko den baco, di Padang Panjang, biaya sikola dari A sampai Z indak mambayia. Perai!” kato Uncu manjalehan apo nan dibaconyo. “Kalau di Padang Panjang, ambo lai picayo. Karano di situ biaya baubek juo perai,” hanyo itu jawek Tan Baro. “Iyo, Tan. Dalam barita ko dikatoan kalau anak urang bansaik sampai ka sipatu dibalian. Malah nan basikola di sikola swasta juo dibantu saparo. Kalau memang iyo, iko patuik awak puji dan dicontoh dek daerah lain. Ijan perai ka perai se, tapi cuma dalam pidato. Katiko anak-anak lah mulai duduak di rumah sikola, ado-ado se nan ka dibayia. Minimal uang komite,” kecek Uncu baliak. “Tapi lah disabuik salamo ko Ncu. Perai di nan lain tu samo jo naiak oto Kawan ka Piaman. Dari muko kampus u-en-pe awak naiak iyo perai. Tapi sampai di Lubuak Buayo lah ado je manusia nan mintak pitih. Kecek wee nan mamintak tu hanyo tambahan bali minyak. Padohal, nan dimintak lah jalaih seyo oto,” Ajo Tondeh indak katinggalan mangaluakan pandapeknyo. “Batua mah Jo, untuak baraja tambahan ado juo iyurannyo mah,” sambuang Mak Pono. “Nan jalaih, ado namoe pitih komite. Kecek kapalo sikola, itu urusan pangurus komite. Padohal nan manjadi sutradara di situ kapalo sikola juo,” kato Ajo. “Manuruik den, indak paralu ado komite-komite tu doh. Karano rato-rato pangurus komite tu tokoh masyarakaik nan kayo-kayo, atau nan indak pernah marasoan padiah iduik,” kato Udin Kuriak pulo. “Kalau memang iyo pandidikan perai di rumah sikola pamarentah, sarancaknyo tiru apo nan lah dilakukan di Padang Panjang. Kapalo dinas pandidikan jo kapalo-kapalo sikola paralu malakukan studi bandiang ka Kota Sarambi Makah tu. Hanyo itu saran ambo,” baitu kecek Tan Baro. (eSPe St.Soeleman)