Bingik

Kadang-kadang pajabaik di nagari awak ko ado pulo nan bingik. Mancaliak urang lain barasil, tabik raso cimburunyo. Inyo surang indak punyo kamampuan. Di koran ‘Singgalang’ kapatang ado barita nan mangatoan pamarentah nagari ko tabik berang mancaliak parusahaan BlackBerry mambuek pabirik di Malaysia. Malah, barita itu salain maundang ota juo maundang galak. Baa ka indak? Urang jo harato surang, awak se nan tabik rabo. “Iko iyo lawak baritanyo mah,” kecek Mak Pono. “Lawak baa Mak?” Tanyo Angah Piyan. “Urang mambuek pabirik di tampek lain, awak se nan tabik rabo,” jawek Mak Pono. “Mukasuik Mamak?” Tanyo Angah baliak. “Iko ha, caliaklah barita ko dek Angah. Belek beri mambuek pabirik di Malaysia, nan awak marabo se. Tabik bingik awak,” jawek Mak Pono. “Baa kok bantuak itu Mak?” Giliran Udin Kuriak. “Kecek pamarentah, urang di nagari ko paliang banyak nan mambali henpon canggih tu, mako harusnyo pabiriknyo dibuek pulo di siko. Manga di Malaysia? Di situ urang mamakai belek beri indak sabanyak di siko. Bantuak itu nan den baco tadi,” kecek Mak Pono manjalehan apo nan dibaco dan dimukasuiknyo. “Ha....ha...., iyo lawak mah. Urang jo haratonyo sughang, manga pulo awak nan bingik. Dima nan taragak dek weelah mambuek pabirik, apo di Malaysia, di Timor Timur atau di Piaman gai,” Ajo Tondeh indak pulo katinggalan basuaro. “Istilah di kampuang de, urang jo jawi sirahnyo, manga awak sato pulo. Kok ka nyo bantai, kok ka nyo bao mambajak, itu tasarah dek nan punyo. Awak indak buliah bingik,” kecek Mak Pono baliak. “Urang pambingik, tando indak mampu. Saindaknyo, indak mampu maajak parusahaan tu untuak mambuek pabirik di nagari ko,” baitu komentar Tan Baro. “Di nagari awak ko banyak masalah. Banyak bana pitih kalua. Ado nan resmi, ado lo nan indak. Kok mambuek pabirik di nagari ko, mulai dari pareman balai sampai pajabaik tinggi musti diagiah pitih. Antah kini kok indak lai,” Kari Garejoh indak katinggalan pulo basuaro. “Harusnyo pamarentah maevaluasi diri ndak Ri. Baa mangko investor tu mamiliah nagari lain. Baa kok indak di Indonesia raya gadang ko ha. Karano harus diakui kalau pangsa pasar apo sajo, memang banyak di Indonesia. Urang Indonesia ko suko balanjo,” kato Tan Baro baliak. (eSPe St.Soeleman)