Tilang Ban-Palanta Lapau

Badarai galak urang-urang di lapau Uwo Pulin mandanga ota Kari Garejoh pagi kapatang. Baa ka indak? Kari bacarito ‘parang’ antaro supir oto prah jo patugas nan maraso lawak. Bayangkan, indak hanyo SIM jo STNK se nan ditilai lai, tapi dongkrak jo ban serap juo disita dek patugas. “Ha....ha...., tangguang mah Ri. Manga indak ban nan lakek tu se ditilang. Kalau ban nan lakek dibukak dan ditilang patugas, kan ndak bisa lai oto tu bajalan,” kato Tan Baro. “Batua mah Ri, sakalian tilang gardannyo bagai atau sitiur oto tu. Kalau nan duo tu dibao ka kantua polisi otomatis indak bisa jalan lai doh. Kalau ban nan ditilang, den raso masih bisa urang tu manyalang ban kawannyo atau minimal baganti-gantinyo mamakai ban,” Angah Piyan lah basuaro pulo. “Ha....ha...., yo aneh-aneh se di nagari ko nampak di den mah. Kini pilolah den mandanga palanggaran aturan balalulintas sampai-sampai manilang dongkrak jo ban serap. Nan biasonyo ditilang tu surek-surek sarupo SIM, STNK atau buku kir. Kalau itu indak ado, otonyo ditahan. Tapi kini, otonyo dipabiakan bajalan dan masih maangkuik muatan malabiahi tonase. Kalau dongkrak jo ban serap, apo bana pangaruahnyo. Saandainyo pacah ban di jalan, masih bisa maminjam dongkrak kawan. Saandainyo indak ado ban serap, disalang pulo ban serap kawan. Den sacaro pribadi satuju kalau oto tu bana nan ditahan. Kalau sopirnyo mambangkang, jo supir-supirnyo tu bana ditahan,” baitu kecek Mak Pono. Mak Pono adolah urang nan paliang muak mancaliak ulah oto prah bamuatan malabiahi tonase tu. Malah, inyo sabana trauma mancaliak oto-oto sarupo itu. Maklum, Mak Pono tiok sabanta mancaliak kacalakaan oto prah di Sitinjau Lawik atau tampek-tampek lain. Ado nan batajun ka jurang, ado nan maantak tabiang, ado nan mandaram kandaraan lain. “Baa kok berang bana Mamak ka oto prah tu?” Tanyo Kudun. “Dek ulah muatan bareknyo tu abih jalan. Dek ulah bamuatan barek, tajadi macet. Dek ulah bamuatan barek tu, inyo kacalakaan. Kalau jalan rusak dan macet, itu pasti marugikan urang banyak. Tapi saandainyo tajadi kacalakaan nan malibatkan oto tu, kan induak samangnyo nan rugi. Bahkan, supirnyo pun bisa rugi. Cubo bayangkan, saandainyo supir tu patah, luko ataupun maningga. Nah, kan gadang mudaratnyo muatan balabiah tu? Makonyo den paliang satuju patugas bategas-tegas jo supir oto bantuak itu,” jawek Mak Pono panjang leba. “Tapi kan pangusaha manjadi rugi saandainyo muatannyo dibatasi,” kecek Udin Kuriak. “Itu kan kecek pangusaha. Pitih ko samo jo aia lawik. Samakin diminum samakin awih. Ciek lai urang awak ko kalau tibo rugi inyo mamakiak-makiak. Tapi cubolah galehnyo balabo, pasti anok,” jawek Mak Pono pulo. “Kalau bantuak itu, tilang se lah ban oto tu Mak. Kalau paralu bao se oto tu ka kantua,” sorak Kudun. “Kalau dibao ka kantua, dima ka diparkir?” Tanyo Tan Baro. Mak Pono indak bisa lai manjawek. Nan pasti inyo satuju patugas bategas-tegas jo oto prah nan kalabiahan muatan. Karano mudaratnyo labiah gadang daripado manfaatnyo. (eSPe St.Soeleman)