Baladang di Pungguang Anak-Padang

Matoari mulai marangkak naiak. Jalan dan simpang-simpang lah rami dek anak sikola sarato urang-urang nan ka barangkek karajo. Angkutan kota kadang-kadang nampak sarupo dikaja setan. Indak paduli jalan rami dan banyak simpang nan ka maundang cilako. Di lapau Uwo Pulin, Tan Baro sarato konco-konconyo lah duduak pulo minum kopi sambia mambaliak-baliak koran ‘Singgalang’. Sudah tu, barita-barita nan diraso angek atau nan bahubuangan jo kapentiangan basamo dijadikan bahan ota. Itulah kabiasaan satiok pagi di situ. “Iko lah ado lo ciek lai nampaknyo mah Ngah. Kapatang ko anak es-em-a nan bademo dek ulah masalah pakaian. Iko giliran anak es-em-ka nan protes,” kato Mak Pono ka Angah Piyan nan duduak basabalahan. “Apo lo masalahnyo tu Mak?” Tanyo Angah nio tau. “Indak bara beda jo anak es-em-a kapatang doh. Kalau nan kapatang pakaian dikatokan ilang di jalan, nan kini pakaian batiak indak sasuai kualitasnyo jo pitih nan dibayiakan dek anak murik. Kecek anak-anak sikola tu, dasar kain nan dijadian batiak tu tipih, bantuak kain murah se. Padohal urang tuo murik tu lah mambayia maha,” baitu panjalasan Mak Pono nan didanga sarius dek Angah. “Kadang-kadang lah manjadi tradisi dek sabagian kapalo sikola, baladang di pungguang anak murik. Sajak dulu, ado-ado se galeh kapalo sikola. Den yakin pangadaan pakaian sikola mulai dari pakaian saragam, pakaian olahraga, batiak sampai pakaian muslim tu mauntuangkan kapalo sikola. Kalau ado kapalo sikola nan mangaku manolong se, itu panduto namonyo mah. Pasti ado labonyo. Wak misal se untuak surang murik dapek labo saribu rupiah se lah. Saandainyo ado murik tigo ratuih urang mako dapek labo tigo ratuih ribu hanyo untuak ciek pakaian. Tadi jinih pakaian tu ado ampek, mako lah sajuta duo ratuih. Den yakin, indak mungkin saribu labo galeh tu doh. Saandainyo limo ribu labo ciek pakaian, kalikanlah,” baitu pandapek Angah. “Batua mah Ngah. Dima-dima sajo, mulai dari es-de sampai es-em-a, pasti pitih manjadi masalah. Ado-ado se nan harus dibali dek anak murik di rumah sikola. Paliang indak, nan harus dibali di rumah sikola tu yo pakaian olahraga jo batiak. Itu samati-mati angin mah. Salain itu ado pulo nan manjua buku bagai ka anak murik. Nah, bak kecek Angah tadi satiok nan dibalian tu pasti punyo ujuang atau untuang. Jadi, alun bisa dek pamarentah malarang kapalo sikola atau guru-guru babisnis di rumah sikola lai,” kato Tan Baro. “Kalau indak bantuak itu tantu indak saragam pakaian anak Tan!” Sorak Uncu Labai. “Ngarati ambo mah Ncu. Cuma jan gadang bana lakuaknyo. Pakai se prinsip jariah manantang buliah. Ijan dipakai prinsip bisnis atau prinsip manggaleh nan harus manantang labo. Kalau gadang bana lakuaknyo, itu namonyo baladang di pungguang anak sikola. Ingek, indak saluruh urang tuo murik tu punyo kamampuan ekonomi doh. Banyak nan jo pitih bautang atau manjua-manggadai bagai untuak bisa sikola. Kalau nan bantuak itu awak tabeh juo, itu kan samo se jo marawik pinjaik,” Tan Baro mancubo manjalehan sakalian maagiah jalan kaluanyo. “Baa juo lai Tan. Ikolah modenyo nagari awak,” Uwo Pulin sato mangecek saketek sambia lalu. (eSPe St.Soeleman)