Impor Daun Salam-Palanta

“Haaah....., sipadeh juo diimpor? Lai sabananyo ko?” Samo takajuik urang salapau mandanga kato-kato dari Mak Pono. Baa ka indak? Sadang lamak maota masalah resapel kabinet, tibo-tibo se Mak Pono basuaro bantuak itu. “Batoh bantuak dipantak sipasan bana Mak Pono mah?” Tanyo Ajo Tondeh. “Baa ka indak dek Ajo. Nagari ko sajak saisuak lah tanamo subur. Ijankan sipadeh, tungkek se diantak an ka bumi bisa manjadi tanaman. Tapi kini den paratian lah sadonyo se diimpor dari lua nagari. Kalau hanyo impor kandaraan, elektronik atau masin-masin den raso biaso tu nyo. Iko indak, buah-buahan diimpor, kapatang kantang juo diimpor dan kini baritanyo sipadeh nan didatangkan dari lua nagari. Apo iko indak aneh namonyo dek Ajo? Jadi, wajar se den maraso dipantak labah atau disangek sipasan gai mambaconyo,” baitu jawek Mak Pono. “Dek Ajo memang indak taraso aneh doh Mak, karano nan ado di situ ikan jo sala lauak, tambah stek cimeeh,” kato Kari Garejoh sambia galak manih. “Batoh lansuang se tembak ka gawang mah Ri. Lai banyak juo tanaman mudo di kampuang den tu mah,” baleh Ajo. “Tanaman mudo atau daun mudo Jo?” Sorak Tacin Barain. “Sumbarang dek Tacin je lah. Kalau memang kantang jo sipadeh kini lah didatangkan dari lua nagari, iko katalaluan namoe mah. Urang nan mandatangkannyo tu paralu dicas akinyo. Baa dek Tan Baro?” Ajo mulai sarius sambia mintak pandapek Tan Baro. “Batua Jo. Ambo raso kantang jo sipadeh lai indak kurang di patani awak doh. Caliaklah ka- kampuang Mak Pono, sabana malimpah kaduonyo. Iko ambo raso akibaik padagangan bebas nan indak ado sariangannyo mah,” baitu komentar Tan Baro. “Iyo mah Tan. Kalau manuruik den buliah-buliah se padagangan bebas, tapi harus ado batehnyo. Kalau barang-barang nan lai banyak di nagari awak, harus dilarang masuak. Kalau bantuak iko kajadiannyo kan taniayo patani kantang jo sipadeh. Jan-jan bisuak daun salam, langkueh, daun kunik, sarai, kucai sampai daun limau puruik gai diimpor dari lua nagari,” kecek Kari. “Ha...ha...., kalau sempat nagari ko maimpor daun salam bagai, itu aratinyo pambunuahan barancana untuak patani mah. Daripado mambunuah patani jo caro bantuak itu, ghancak pakai indighin atau tiodan je ndak Mak?” Potong Ajo. “Batua! Di kampuang ambo atau malah di Jawa banyak patani kantang, bawang, lado sampai sipadeh jo kuniknyo, tapi pamarentah mampabiakan se urang manggaleh barang-barang tu dari lua nagari. Iko nan indak bisa ditarimo,” kato Mak Pono. “Jadi, sakali lai iko dek ulah indak ado pambatasan dari pamarentah. Mustinyo di tiok-tiok palabuahan tu harus dipareso bana elok-elok apo galeh urang tu. Kalau galehnyo bumbu atau sayua nan lai ado di siko, harusnyo dibaliak an ka negara asanyo baliak. Ijan dipabiakan baredar di siko. Karano bisa mamatikan usao patani,” kecek Tan Baro. Itulah ota di lapau Uwo Pulin pagi kapatang. Barita koran ‘Singgalang’ nan bajudul “Indonesia Negeri Sakit, Jahe juga Diimpor’ manjadi sabab timbuanyo ota bantuak itu. (eSPe St.Soeleman)