“Batua barita ko mah!” Sorak Angah Piyan.
“Kalau ndak batua barita koran itu namonyo carito Ngah,” semba Udin Kuriak.
“Nan indak batua tu kaba kancia atau kaba nenek garagasi. Namonyo dongeang,” kato Mak Pono
“Carito rabab juo indak kajadian sabananyo doh. Kan iyo ndak Ncu?” semba Malin Kacindin.
Itulah ota antaro Angah, Udin, Mak Pono dan Malin nan samo duduak di palanta lapau Uwo Pulin pagi kapatang. Salain urang barampek tu, juo ado konco-konco lain. Pokoknyo pagi kapatang buliah dikatoan langkok komunitas lapau tu. Nan alun nampak batang iduangnyo cuma Pak Osu nan dalam duo bulan balakangan acok di kampuang. Keceknyo sadang manolong urang gaeknyo nan sadang mambangun rumah.
Angah sapandapek jo barita gadang di koran ‘Singgalang’ nan bajudul ‘Stop Mitos Presiden Harus Orang Jawa’. Dalam pikiran Angah, salain urang Jawa, banyak urang hebat nan bisa manjadi presiden. Malah di barita itu juo dibaconyo baraso Bupati Bantul di Jawa tu urang awak.
“Maso iyo Jawa ka Jawa se. Apo memang urang hebat tu cuma di Jawa?” Baitu kato Angah baliak.
“Indak Ngah. Salain urang Jawa, urang awak banyak pulo nan hebat. Sejarah mambuktikan, negara ko didirikan indak hanyo dek urang Jawa, tapi juo urang awak. Proklamator sajo basandiang antaro urang Jawa jo urang awak. Tokoh Sumpah Pemuda nan banamo Muhammad Yamin juo urang awak. Bacolah sejarah, banyak urang awak nan hebat samanjak dulu. Tapi takana dek ambo, masalahnyo apo Ngah?” Kecek Tan Baro nio tau mukasuik kawannyo tu.
“Iko Tan. Kini kan lah mulai eboh pulo di media masalah calon-calon presiden. Kabatulan hari ko ado barita nan mangatoan supayo jan hanyo Jawa ka Jawa se nan diusulkan dan dipiliah. Urang-urang di lua Jawa juo banyak nan hebat,” jawek Angah.
“Oh, itu. Memang sajak negara ko merdeka nan manjadi presiden tu urang Jawa. Urang Jawa tu banyak jumlahnyo dibandiang urang awak atau urang lua Jawa. Jadi, kalau ado urang lua Jawa nan mancalonkan diri atau dicalonkan, indak yakin ka bisa tapiliah doh. Itu nan ado di utak urang di republik ko,” kecek Tan Baro.
“Indak salalu doh. Di barita iko juo dikatokan, urang awak bisa tapiliah manjadi bupati di Bantul. Itu kan aratinyo urang Jawa indak salalu mamiliah urang Jawa,” baleh Angah.
“Kabatulan se tu nyo. Ciek lai, mamiliah bupati jo presiden tantu jauah bedanyo,” potong Kari Garejoh.
“Batua! Tapi saindaknyo awak cubo maubah kabiasaan-kabiasaan bantuak itu. Mari awak bapikia Indonesia dalam mancari pamimpin bangsa. Ijan bapikia daerah juo lai. Kalau ado nan dipandang hebat dari lua Jawa bisa manjadi presiden dalam rangka manjadikan negara ko labiah elok, manga indak awak agiah kasampatan untuak dipiliah. Indonesia ko kan indak Jawa se doh. Jadi, bapikialah awak dalam skala nan labiah laweh,” kato Angah.
“Pitih-pitihnyo baa Ngah?” Tanyo Tacin Barain.
“Kalau ado nan diraso batua-batua bisa maubah kondisi nagari ko, basamo-samo awak mambantu biayanyo. Bilo paralu awak larang tokoh tu mangaluakan pitih. Baa gak ati?” jawek Angah.
Baitulah ota di lapau Uwo Pulin pagi kapatang.
(eSPe St.Soeleman)
“Kalau ndak batua barita koran itu namonyo carito Ngah,” semba Udin Kuriak.
“Nan indak batua tu kaba kancia atau kaba nenek garagasi. Namonyo dongeang,” kato Mak Pono
“Carito rabab juo indak kajadian sabananyo doh. Kan iyo ndak Ncu?” semba Malin Kacindin.
Itulah ota antaro Angah, Udin, Mak Pono dan Malin nan samo duduak di palanta lapau Uwo Pulin pagi kapatang. Salain urang barampek tu, juo ado konco-konco lain. Pokoknyo pagi kapatang buliah dikatoan langkok komunitas lapau tu. Nan alun nampak batang iduangnyo cuma Pak Osu nan dalam duo bulan balakangan acok di kampuang. Keceknyo sadang manolong urang gaeknyo nan sadang mambangun rumah.
Angah sapandapek jo barita gadang di koran ‘Singgalang’ nan bajudul ‘Stop Mitos Presiden Harus Orang Jawa’. Dalam pikiran Angah, salain urang Jawa, banyak urang hebat nan bisa manjadi presiden. Malah di barita itu juo dibaconyo baraso Bupati Bantul di Jawa tu urang awak.
“Maso iyo Jawa ka Jawa se. Apo memang urang hebat tu cuma di Jawa?” Baitu kato Angah baliak.
“Indak Ngah. Salain urang Jawa, urang awak banyak pulo nan hebat. Sejarah mambuktikan, negara ko didirikan indak hanyo dek urang Jawa, tapi juo urang awak. Proklamator sajo basandiang antaro urang Jawa jo urang awak. Tokoh Sumpah Pemuda nan banamo Muhammad Yamin juo urang awak. Bacolah sejarah, banyak urang awak nan hebat samanjak dulu. Tapi takana dek ambo, masalahnyo apo Ngah?” Kecek Tan Baro nio tau mukasuik kawannyo tu.
“Iko Tan. Kini kan lah mulai eboh pulo di media masalah calon-calon presiden. Kabatulan hari ko ado barita nan mangatoan supayo jan hanyo Jawa ka Jawa se nan diusulkan dan dipiliah. Urang-urang di lua Jawa juo banyak nan hebat,” jawek Angah.
“Oh, itu. Memang sajak negara ko merdeka nan manjadi presiden tu urang Jawa. Urang Jawa tu banyak jumlahnyo dibandiang urang awak atau urang lua Jawa. Jadi, kalau ado urang lua Jawa nan mancalonkan diri atau dicalonkan, indak yakin ka bisa tapiliah doh. Itu nan ado di utak urang di republik ko,” kecek Tan Baro.
“Indak salalu doh. Di barita iko juo dikatokan, urang awak bisa tapiliah manjadi bupati di Bantul. Itu kan aratinyo urang Jawa indak salalu mamiliah urang Jawa,” baleh Angah.
“Kabatulan se tu nyo. Ciek lai, mamiliah bupati jo presiden tantu jauah bedanyo,” potong Kari Garejoh.
“Batua! Tapi saindaknyo awak cubo maubah kabiasaan-kabiasaan bantuak itu. Mari awak bapikia Indonesia dalam mancari pamimpin bangsa. Ijan bapikia daerah juo lai. Kalau ado nan dipandang hebat dari lua Jawa bisa manjadi presiden dalam rangka manjadikan negara ko labiah elok, manga indak awak agiah kasampatan untuak dipiliah. Indonesia ko kan indak Jawa se doh. Jadi, bapikialah awak dalam skala nan labiah laweh,” kato Angah.
“Pitih-pitihnyo baa Ngah?” Tanyo Tacin Barain.
“Kalau ado nan diraso batua-batua bisa maubah kondisi nagari ko, basamo-samo awak mambantu biayanyo. Bilo paralu awak larang tokoh tu mangaluakan pitih. Baa gak ati?” jawek Angah.
Baitulah ota di lapau Uwo Pulin pagi kapatang.
(eSPe St.Soeleman)
Postingan
Tidak ada komentar:
Posting Komentar