Tanyato masalah perombakan kabinet indak hanyo manjadi isu atau carito lamak urang-urang politik tingkek tinggi, tapi juo manjadi ota dek urang-urang palapau. Saindaknyo, di lapau Uwo Pulin juo ado ota masalah itu.
“Kini den tau kalau nan resapel tu aratinyo manambah wakia mantari. Jadi, kalau bisuak ado panambahan wakia kapalo sikola, juo resapel namonyo. Iyo baitu Tan?” Itulah kalimaik partamo kalua dari muncuang Pak Osu.
“Samo wak mah Su. Salamo ko, resapel kecek urang, lah resapel lo kecek den. Ruponyo ikolah bantuak barangnyo,” kato Kudun.
“Resapel tu untuak manembak buruang pakai kajai benen sepeda,” potong Mak Pono.
“Itu katapel Mak!” Semba Tan Baro.
“Resapel tu buah-buahan,” salo Udin Kuriak.
“Itu apel. Nan resapel tu istilah politik. Aratinyo bana parombakan kabinet. Nah samo se jo awak marombak bangunan, ado nan baraliah dan ado nan lai di situ juo,” baitu Tan Baro maagiah panjalasan ka konco-konconyo.
“Tapi den caliak kini indak bantuak itu doh. Nampaknyo manambah wakia se. Kalau bantuak iko, manuruik den namonyo tukuak-tambah, bukan resapel. Baa dek Kari?” Kecek Udin sambia mintak pandapek konco palangkinnyo.
“Apo masalahnyo?” Tanyo Kari Garejoh.
“Hoalah, badannyo se nan di siko nampaknyo. Resapel tu, apo lah batua kalau hanyo manambah wakia mantari?” Kato Udin baliak.
“Kalau manuruik den, tasarah dek presiden se lah. Kok ka inyo tambah, ka inyo kurangi, inyo pindahan atau inyo ganti, wak den indak paduli. Nan pentiang negara ko lai aman. Lai masih bisa awak mancari bareh. Lai indak ado bom atau teroris. Kok balanjo awak di pasa, lai masih murah juo harago barang. Alah tu mah,” baitu pandapek Kari.
“Ha....ha...., lain lo coraknyo dek Kari yo?” Potong Angah Piyan.
“Eh, itu pandapek den. Karano, sia sajo nan ka jadi mantari, nan politik di negara ko akan saliang manjatuahan juo nyo. Samo jo panjek batang pinang. Picayolah, urang paliang hebat sadunia nan dijadian mantari dek presiden kini ko pasti juo mandapek kritikan. Politik urang awak ko cuma bisa mangaritik. Bak kecek-kecek awak salamo ko samo jo panonton bola. Pamain lah mati-matian, lah tapanca salemo dek main sasuai arahan palatiah, tapi kecek panonton salah juo. Kok disuruah panonton tu masuak lapangan, alun sampai saminik balari lah tangga angoknyo mah. Baa dek Mak Pono?” hanyo itu komentar Kari sambia mintak pandapek ka Mak Pono.
“Suai. Den juo indak paduli sia nan ka jadi mantari atau wakia mantari. Nan pentiang lai masih mardeka juo awak bakureh. Lai indak maha barang-barang nan dibali untuak kaparaluan iduik. Alah tu mah,” baitu tanggapan Mak Pono.
Samo-samo tamanuang urang di dalam lapau tu mandanga pandapek Kari sarato Mak Pono. Rasonyo batua juo apo nan dikatoan kaduonyo. Resapel tu hak presiden dan rakyaik indak buliah talampau mancikaraui. Kalau satiok garik presiden dicikaraui, bilo juo presiden sarato kabinetnyo tu bakarajo lai? (eSPe St.Soeleman)
“Kini den tau kalau nan resapel tu aratinyo manambah wakia mantari. Jadi, kalau bisuak ado panambahan wakia kapalo sikola, juo resapel namonyo. Iyo baitu Tan?” Itulah kalimaik partamo kalua dari muncuang Pak Osu.
“Samo wak mah Su. Salamo ko, resapel kecek urang, lah resapel lo kecek den. Ruponyo ikolah bantuak barangnyo,” kato Kudun.
“Resapel tu untuak manembak buruang pakai kajai benen sepeda,” potong Mak Pono.
“Itu katapel Mak!” Semba Tan Baro.
“Resapel tu buah-buahan,” salo Udin Kuriak.
“Itu apel. Nan resapel tu istilah politik. Aratinyo bana parombakan kabinet. Nah samo se jo awak marombak bangunan, ado nan baraliah dan ado nan lai di situ juo,” baitu Tan Baro maagiah panjalasan ka konco-konconyo.
“Tapi den caliak kini indak bantuak itu doh. Nampaknyo manambah wakia se. Kalau bantuak iko, manuruik den namonyo tukuak-tambah, bukan resapel. Baa dek Kari?” Kecek Udin sambia mintak pandapek konco palangkinnyo.
“Apo masalahnyo?” Tanyo Kari Garejoh.
“Hoalah, badannyo se nan di siko nampaknyo. Resapel tu, apo lah batua kalau hanyo manambah wakia mantari?” Kato Udin baliak.
“Kalau manuruik den, tasarah dek presiden se lah. Kok ka inyo tambah, ka inyo kurangi, inyo pindahan atau inyo ganti, wak den indak paduli. Nan pentiang negara ko lai aman. Lai masih bisa awak mancari bareh. Lai indak ado bom atau teroris. Kok balanjo awak di pasa, lai masih murah juo harago barang. Alah tu mah,” baitu pandapek Kari.
“Ha....ha...., lain lo coraknyo dek Kari yo?” Potong Angah Piyan.
“Eh, itu pandapek den. Karano, sia sajo nan ka jadi mantari, nan politik di negara ko akan saliang manjatuahan juo nyo. Samo jo panjek batang pinang. Picayolah, urang paliang hebat sadunia nan dijadian mantari dek presiden kini ko pasti juo mandapek kritikan. Politik urang awak ko cuma bisa mangaritik. Bak kecek-kecek awak salamo ko samo jo panonton bola. Pamain lah mati-matian, lah tapanca salemo dek main sasuai arahan palatiah, tapi kecek panonton salah juo. Kok disuruah panonton tu masuak lapangan, alun sampai saminik balari lah tangga angoknyo mah. Baa dek Mak Pono?” hanyo itu komentar Kari sambia mintak pandapek ka Mak Pono.
“Suai. Den juo indak paduli sia nan ka jadi mantari atau wakia mantari. Nan pentiang lai masih mardeka juo awak bakureh. Lai indak maha barang-barang nan dibali untuak kaparaluan iduik. Alah tu mah,” baitu tanggapan Mak Pono.
Samo-samo tamanuang urang di dalam lapau tu mandanga pandapek Kari sarato Mak Pono. Rasonyo batua juo apo nan dikatoan kaduonyo. Resapel tu hak presiden dan rakyaik indak buliah talampau mancikaraui. Kalau satiok garik presiden dicikaraui, bilo juo presiden sarato kabinetnyo tu bakarajo lai? (eSPe St.Soeleman)
Postingan
Tidak ada komentar:
Posting Komentar