Nan Batino Jan Digaduah-Palanta

“Jan sampai salah ndak Lin. Nan batino jan digaduah!” Kato-kato bantuak itu maluncua dari muncuang Angah Piyan nan samo-samo duduak jo kawan-kawannyo minum kopi di palanta lapau Uwo Pulin. Di lua lapau hujan labek. Anak-anak sikola dan urang-urang pai karajo nampak mamakai payuang. Sadangkan nan jo motor tapaso pakai mantel. Bahkan ado pulo mambungkuih badannyo jo plastik. Memang, sajak duo pakan ko hujan turun indak bakatantuan. Kadang pagi, kadang siang dan kadang malam. Tapi dalam tigo atau ampek hari ko, hujan turun sapanjang hari, dari pagi sampai malam. Di kampuang Uncu Labai, hujan bakapanjangan lah mambuek banjir gadang. Kecek koran ‘Singgalang’ ado salapan kacamatan nan tarandam banjir. Tujuah urang keceknyo ilang dan tujuah baleh ribu labiah rumah tarandam. Tipi dari Jakarta juo mambaritakan kajdiannyo. Dek musibah itu pulo, pagi-pagi bana Uncu pulang kampuang jo kamanakannyo. Kabanyo sawah jo rumah dunsanak Uncu dihondoh banjir. Untuang se, lai indak ado kaluarganyo nan anyuik. “Kalau nan jantan-jantan, tantu iyo manggaduah nan batino Ngah. Kok nan jantan juo wak gaduah, namonyo limau makan limau mah,” kato Malin Kacindin. “Indak itu kecek den doh Lin. Karano Malin panitia kurban di musajik, ijan sampai mandabiah jawi batino,” Angah maluruihan mukasuiknyo. “Baa tu?” Tanyo Malin. “Kalau nan batino didabiah tantu indak bisa jawi bakambang biak. Karano itu, kalau sempat nan batino digaduah, panjaro tantangannyo. Bacolah barita ko dek Malin!” Kecek Angah mampacaliak-an barita di koran ‘Singgalang’ nan bajudul ‘Memotong Sapi Betina Diancam Penjara’. “Nan batino tu kabaranak gai Lin!” Semba Kari Garejoh. “Tantu iyo batino nan baranak. Alun ado jawi jantan nan baranak lai doh,” potong Malin. “Dek itulah pamarentah malarang panitia kurban mandabiah jawi batino,” kato Angah baliak. “Samo pulo jo awak mah Lin. Saandainyo dalam kaluarga atau kaum awak indak ado nan padusi, mako putuih katurunan. Kecek urang kampuang den, punah namonyo. Nah, kalau sampai punah jawi di nagari awak tantu tapaso dibali atau bisa juo diimpor dari lua nagari. Jikok itu nan tajadi, tantu samakin malu awak. Maso iyo di nagari subur ko indak ado jawi,” kato Mak Pono. “Untuang se lai jantan sadonyo jawi jo kambiang nan ka didabiah rayo bisuak,” kato Malin. “Ciek lai Lin. Mandabiah jawi kurban tu harus ado izin dari Dinas Paternakan,” Tan Baro lah sato pulo. “Banyak bana aturannyo mah. Sajak saisuak awak bakurban di musajik indak pakai aturan-aturan bantuak iko doh,” baleh Malin. “Iko paralu supayo tau baraso jawi nan awak dabiah tu lai sehat atau indak. Kan kini banyak panyakik taranak. Kalau taranak nan awak dabiah sakik, partamo kurban urang indak sah, nan kaduo panyakiknyo bisa pulo manular ka manusia nan mamakan dagiangnyo. Jadi, jan dianggap aturan iko mambarek-an. Kalau manuruik ambo, kasadonyo untuak awak-awak juo,” kato Tan Baro manjalehan. Maangguak Malin mandanganyo. (eSPe St.Soeleman)