“Ha....ha...., indak jadi wee pai doh Mak!”
Baitu sorak Ajo Tondeh ka Mak Pono nan baru masuak lapau pagi kapatang. Tantu sajo tacingangak Mak Pono dibueknyo. Karano indak jaleh apo nan dimukasuik dek kawannyo tu.
“Baru masuak lapau den lah Ajo sorak-an!” Hanyo itu komentar Mak Pono sambia mancari posisi duduak nan pas.
“Biasonyo batanyo lapeh arak, barundiang sudah makan Jo. Iko Mak Pono baru masuak lapau lah baajak barundiang,” Udin Kuriak mancubo maangek-an suasana.
“Elok-elok stek Din. Wak den indak ado maajak Mak Pono barundiang doh. Apo pulo nan wak den rundiangan jo wee? Wak den cuma maagiah tau, wakia-wakia rakyaik nan ka pai baraja mandabiah ka Spanyol tu indak jadi pai,” baitu Ajo maagiah panjalasan ka Udin.
“Kalau urang-urang tu indak jadi pai, awak pai baanyo? Kan ka situ pai baraja mandabiah jawi atau istilah kerennyo baraja mamakai pakakeh moderen. Nah, kabatulan bak kecek kapatang kan banyak urang kampuang den baprofesi tukang dabiah, baa kalau inyo se awak suruah ka situ?” Kato Mak Pono.
“Sia maagiah pitihe?” Tanyo Ajo.
“Pamarentahlah. Kan wakia-wakia rakyaik tu kok jadi pai dibiayai dek pamarentah. Kini indak jadi diwakiakan ka inyo doh, rakyaik tu bana nan pai. Nah, tantu pitihnyo juo dari pamarentah. Baa Ajo bapikia ko?” Baleh Mak Pono.
“Kalau manuruik den, indak tapek wakia rakyaik pai ka sinan doh. Kalau memang untuak maoperasikan masin-masin di rumah potong, cukuik kapalo dinas paternakan se jo anak buahnyo,” kato Angah Piyan pulo.
“Indak jadi pai, indak molah, nan iko kan lai jadi pai makan lamak ka Lamun Ombak,” tibo-tibo tadanga suaro Kari Garejoh.
“Sia nan pai makan lamak?” Tanyo Tan Baro.
“Iko ha. Apak ko mintak izin pai baubek, sudah tu dibae makan lamak,” jawek Kari sambia mampacaliak-an barita nan bajudul ‘Dikawal Jaksa, Djufri Makan Lamak di Lamun Ombak’.
“Oh itu biaso se tu nyo. Kan salamo ko apak tu indak pernah makan lamak. Yo, samo tau se lah awak baa mode makanan di tahanan. Kabatulan ado kasampatan untuak makan sambia pai baubek, kan apo salahnyo dipagunoan. Itu namonyo sambia manyalam minum aia. Sambia pai baubek, makan lamak ciek lu. Mudah-mudahan dek batuka makanan tu bisa mambuek inyo sehaik,” baitu komentar Tan Baro.
“Tapi lai indak jangga makan-makan lamak jo jaksa tu Tan? Karano kasusnyo kan sadang dalam sidang,” tanyo Kari.
“Jangga atau indak jangganyo tu tagantuang urang mamandang dan tagantuang niaik urang-urang nan talibat. Ciek lai, jaksa nan makan tu kan nan mangawal. Jadi, biaso se tu nyo nan dikawal makan, nan mangawal tantu sato pulo makan. Kacuali nan mangawal tu robot, iyo indak paralu makan doh,” jawek Tan Baro baliak.
“Apak tu pai makan karano praktek dokternyo manjalang mugarik. Kan indak mungkin mananti jo paruik kosong dari tangah hari sampai patang,” Angah Piyan mancubo pulo manjalehan sasuai jo nan inyo baco.
Baitulah ota komunitas lapau Uwo Pulin pagi kapatang. Pokoknyo ado-ado se nan dijadikan bahan ota.
(eSPe St.Soeleman)
Baitu sorak Ajo Tondeh ka Mak Pono nan baru masuak lapau pagi kapatang. Tantu sajo tacingangak Mak Pono dibueknyo. Karano indak jaleh apo nan dimukasuik dek kawannyo tu.
“Baru masuak lapau den lah Ajo sorak-an!” Hanyo itu komentar Mak Pono sambia mancari posisi duduak nan pas.
“Biasonyo batanyo lapeh arak, barundiang sudah makan Jo. Iko Mak Pono baru masuak lapau lah baajak barundiang,” Udin Kuriak mancubo maangek-an suasana.
“Elok-elok stek Din. Wak den indak ado maajak Mak Pono barundiang doh. Apo pulo nan wak den rundiangan jo wee? Wak den cuma maagiah tau, wakia-wakia rakyaik nan ka pai baraja mandabiah ka Spanyol tu indak jadi pai,” baitu Ajo maagiah panjalasan ka Udin.
“Kalau urang-urang tu indak jadi pai, awak pai baanyo? Kan ka situ pai baraja mandabiah jawi atau istilah kerennyo baraja mamakai pakakeh moderen. Nah, kabatulan bak kecek kapatang kan banyak urang kampuang den baprofesi tukang dabiah, baa kalau inyo se awak suruah ka situ?” Kato Mak Pono.
“Sia maagiah pitihe?” Tanyo Ajo.
“Pamarentahlah. Kan wakia-wakia rakyaik tu kok jadi pai dibiayai dek pamarentah. Kini indak jadi diwakiakan ka inyo doh, rakyaik tu bana nan pai. Nah, tantu pitihnyo juo dari pamarentah. Baa Ajo bapikia ko?” Baleh Mak Pono.
“Kalau manuruik den, indak tapek wakia rakyaik pai ka sinan doh. Kalau memang untuak maoperasikan masin-masin di rumah potong, cukuik kapalo dinas paternakan se jo anak buahnyo,” kato Angah Piyan pulo.
“Indak jadi pai, indak molah, nan iko kan lai jadi pai makan lamak ka Lamun Ombak,” tibo-tibo tadanga suaro Kari Garejoh.
“Sia nan pai makan lamak?” Tanyo Tan Baro.
“Iko ha. Apak ko mintak izin pai baubek, sudah tu dibae makan lamak,” jawek Kari sambia mampacaliak-an barita nan bajudul ‘Dikawal Jaksa, Djufri Makan Lamak di Lamun Ombak’.
“Oh itu biaso se tu nyo. Kan salamo ko apak tu indak pernah makan lamak. Yo, samo tau se lah awak baa mode makanan di tahanan. Kabatulan ado kasampatan untuak makan sambia pai baubek, kan apo salahnyo dipagunoan. Itu namonyo sambia manyalam minum aia. Sambia pai baubek, makan lamak ciek lu. Mudah-mudahan dek batuka makanan tu bisa mambuek inyo sehaik,” baitu komentar Tan Baro.
“Tapi lai indak jangga makan-makan lamak jo jaksa tu Tan? Karano kasusnyo kan sadang dalam sidang,” tanyo Kari.
“Jangga atau indak jangganyo tu tagantuang urang mamandang dan tagantuang niaik urang-urang nan talibat. Ciek lai, jaksa nan makan tu kan nan mangawal. Jadi, biaso se tu nyo nan dikawal makan, nan mangawal tantu sato pulo makan. Kacuali nan mangawal tu robot, iyo indak paralu makan doh,” jawek Tan Baro baliak.
“Apak tu pai makan karano praktek dokternyo manjalang mugarik. Kan indak mungkin mananti jo paruik kosong dari tangah hari sampai patang,” Angah Piyan mancubo pulo manjalehan sasuai jo nan inyo baco.
Baitulah ota komunitas lapau Uwo Pulin pagi kapatang. Pokoknyo ado-ado se nan dijadikan bahan ota.
(eSPe St.Soeleman)
Postingan
Tidak ada komentar:
Posting Komentar