Tanago Lapeh-Palanta

“Pamarentah kota ka manarimo pagawai tanago lapeh, Tan. Lai indak lapeh se kasadonyo tu?” Sadang lamak duduak sambia minum kopi pagi, tibo-tibo Tan Baro takajuik dek tanyo Mak Pono. “Samo jo awak bakarajo di rumah urang. Ado nan diagiah makan siang, tapi ado pulo nan lapeh. Itu kan dietong sabalun bakarajo. Kalau pakai makan siang, sakian. Indak pakai makian siang sakian pulo. Baitu juo jo pagawai lapeh nan Mamak tanyo tu. Bisa se urang-urang nan bakarajo tu hanyo manarimo gaji sajo, indak dapek tunjangan apo-apo,” jawek Tan Baro mancubo maanalisa apo makna pagawai lapeh nan dimukasuik konco palangkinnyo tu. “Nan den takuik-an lai indak lapeh se kasadonyo? Bantuak manolong induak bako,” kecek Mak Pono baliak. “Nan dimukasuik barita di koran ‘Singgalang’ ko adolah tanago kontrak Mak. Urang-urang tu dikontrak bakarajo satahun misalnyo. Kalau masih diparalukan, bisa dipapanjang satahun lai. Baitu sataruihnyo. Bak kecek Tan Baro tadi, urang nan bakarajo tu cuma manarimo gaji sasuai jo kontrak. Kalau tunjangan kan itu ditarimo dek nan mamacik jabatan. Sadangkan urang-urang ko cuma karajo biaso atau manjadi anak buah,” Angah Piyan lah sato pulo mangaluakan pandapeknyo. “Jadi, salasai kontrak, awak indak mandapek apo-apo?” Tanyo Mak Pono. “Yo, baitulah kiro-kiro,” jawek Angah. “Samo jo karajo awak tu nyo?” Mak Pono agak ragu. “Bedanyo cuma tampek dan pakaian se. Kalau awak karajo jo pakaian kumuah, urang-urang tu karajo jo pakaian basandiang dan sipatu bakilek. Biasonyo sistim bantuak itu banyak dipakai dek parusahaan swasta atau pabirik-pabirik. Kan iko pulo nan banyak manjadi buah demo dek buruh di Jakarta salamo ko dek Mamak. Kalau salasai kontrak, yo babaliak ka dasar dan cari karajo lain,” kato Angah manjalehan. “Parcuma se tunyo,” tibo-tibo tadanga suaro Udin Kuriak. “Daripado indak ado karajo Din. Sistim itu ditampuah dek pamarentah kota ko kan dek ulah adonyo paraturan dari pusat indak buliah manarimo pagawai baru. Sadangkan pamarentah kota masih paralu tanago tambahan, jo caro manarimo tanago lapeh tulah jalan kaluanyo,” kato Tan Baro. “Pakai prinsip labiah rancak ado ciek daripado nol, Din!” potong Uncu Labai. “Kok ciek se taruih, nan urang lain lah bajuta-juta kan ndak lo sero doh,” baleh Udin sambia galak manih. “Takana di den, nio manjadi pagawai lo Udin?” Tanyo Angah. “Kalau lai masih bisa baa pulo ka indak dek Angah? Kan pagawai tu dimanjo dek pamarentah. Gaji gadang, kok sakik dijamin, pakai tunjangan dan maso tuo ado pulo pansiunnyo. Tapi karano umua lah indak mamungkinkan lai, tapaso manjadi panonton. Rancana den tadi ka manyuruah kamanakan nan di kampuang sato malamar,” baitu Udin manjalehan. Baitulah mode ota urang-urang di lapau Uwo Pulin pagi kapatang. (eSPe St.Soeleman)

(Singgalang)