“Kok nan batino alah jaleh tu ha, kini giliran nan jantan lo lai.”
“Apo tu Mak?”
“Iko ha, nan padusi kan lah ditangkok kaduonyo, kini giliran nan jantan-jantannyo lai. Kabanyo ado batigo urang nan mamakai malam tu.”
“Apo carito Mamak ko? Sampai jantan jo batino, pakai-mamakai bagai.”
Baitulah debat antaro Udin Kuriak jo Mak Pono. Karano nampaknyo Udin indak mangarati, mako Mak Pono manjalehan baraso nan dimukasuiknyo tu adolah masalah panari talanjang nan lah ditangkok baliak.
Dalam barita nan baru salasai dibaco Mak Pono dikatoan polisi kini sadang mamburu tigo urang laki-laki nan pernah manikmati tari-tarian talanjang kaduo padusi nan ditangkok tu.
“Jadi kini polisi sadang mancari dima nan jantan-jantan tu kini,” kato Mak Pono.
“Oh itu. Den raso kasadonyo lah bakirok ka lua dari Sumbar ko mah. Apolai kalau katigonyo indak urang awak, tantu lamak lenggangnyo di daerah lain,” baitu komentar Udin.
“Untuak apo pulo nan jantan-jantan tu dicari?” Tanyo Tacin Barain.
“Iduik ko kan sabab akibat Cin. Kalau indak dek ulah nan jantan batigo tu, indak mungkin kamanakan awak batalanjang bulek doh. Kalau inyo batalanjang bulek di nan rami, itu gilo namonyo. Iko indak, kamanakan awak ko manari-nari batalanjang bulek di biliak khusus dan nan mambayia adolah katigo paja jantan tu, tantu iyo dicari. Apolai kabanyo upah batalanjang tu sampai kini alun dibayianyo lai. Kini, kamanakan awak lah lalok di panjaro dek ulah inyo,” Mak Pono manjalehan ka Udin.
“Jadi alun dibayianyo lai? Kalau bantuak itu den amuah lo sato mancarinyo mah,” baleh Udin.
“Kok lai buliah pintak jo pinto, capeklah andaknyo katigonyo tatangkok, buliah samo-samo marasoan lalok di panjaro. Karajonyo marusak adaik jo agamo se di nagari ko. Baa dek Tan Baro?” Uncu Labai sato mangecek sambia mintak pandapek Tan Baro nan duduak baadok-adok an jo inyo.
“Suai Ncu!” Hanyo itu nan kalua dari muncuang Tan Baro.
“Suai aponyo?” Tanyo Kari Garejoh.
“Yo suai supayo nan jantan-jantan tu capek pulo tatangkok. Kalau indak lantaran katigonyo nan mamintak manari talanjang, ambo raso juo indak ka ado kajadian tu doh. Jadi ambo sasuai jo pandapek Mak Pono sarato pandapek Uncu Labai. Taniayo kamanakan awak dek ulah pabuatan katigo laki-laki tu,” kato Tan Baro manjalehan apo nan dimukasuiknyo.
“Ciek lai, kalau lai buliah juo awak mamintak, labiah barek hukuman nan jantan tu,” kecek Uncu baliak.
“Yo, kalau masalah hukuman tantu awak sarahan se ka hakim nantinyo. Nan pasti kalimo-limonyo, baiak nan padusi maupun nan jantan lah malangga undang-undang pornografi,” jawek Tan Baro.
Baitulah ota di lapau Uwo Pulin pagi kapatang. Ota bamulo dari barita di koran ‘Singgalang’ nan bajudul ‘Tiga Pria Penikmat Tari Telanjang Diburu’.
(eSPe St.Soeleman)
“Apo tu Mak?”
“Iko ha, nan padusi kan lah ditangkok kaduonyo, kini giliran nan jantan-jantannyo lai. Kabanyo ado batigo urang nan mamakai malam tu.”
“Apo carito Mamak ko? Sampai jantan jo batino, pakai-mamakai bagai.”
Baitulah debat antaro Udin Kuriak jo Mak Pono. Karano nampaknyo Udin indak mangarati, mako Mak Pono manjalehan baraso nan dimukasuiknyo tu adolah masalah panari talanjang nan lah ditangkok baliak.
Dalam barita nan baru salasai dibaco Mak Pono dikatoan polisi kini sadang mamburu tigo urang laki-laki nan pernah manikmati tari-tarian talanjang kaduo padusi nan ditangkok tu.
“Jadi kini polisi sadang mancari dima nan jantan-jantan tu kini,” kato Mak Pono.
“Oh itu. Den raso kasadonyo lah bakirok ka lua dari Sumbar ko mah. Apolai kalau katigonyo indak urang awak, tantu lamak lenggangnyo di daerah lain,” baitu komentar Udin.
“Untuak apo pulo nan jantan-jantan tu dicari?” Tanyo Tacin Barain.
“Iduik ko kan sabab akibat Cin. Kalau indak dek ulah nan jantan batigo tu, indak mungkin kamanakan awak batalanjang bulek doh. Kalau inyo batalanjang bulek di nan rami, itu gilo namonyo. Iko indak, kamanakan awak ko manari-nari batalanjang bulek di biliak khusus dan nan mambayia adolah katigo paja jantan tu, tantu iyo dicari. Apolai kabanyo upah batalanjang tu sampai kini alun dibayianyo lai. Kini, kamanakan awak lah lalok di panjaro dek ulah inyo,” Mak Pono manjalehan ka Udin.
“Jadi alun dibayianyo lai? Kalau bantuak itu den amuah lo sato mancarinyo mah,” baleh Udin.
“Kok lai buliah pintak jo pinto, capeklah andaknyo katigonyo tatangkok, buliah samo-samo marasoan lalok di panjaro. Karajonyo marusak adaik jo agamo se di nagari ko. Baa dek Tan Baro?” Uncu Labai sato mangecek sambia mintak pandapek Tan Baro nan duduak baadok-adok an jo inyo.
“Suai Ncu!” Hanyo itu nan kalua dari muncuang Tan Baro.
“Suai aponyo?” Tanyo Kari Garejoh.
“Yo suai supayo nan jantan-jantan tu capek pulo tatangkok. Kalau indak lantaran katigonyo nan mamintak manari talanjang, ambo raso juo indak ka ado kajadian tu doh. Jadi ambo sasuai jo pandapek Mak Pono sarato pandapek Uncu Labai. Taniayo kamanakan awak dek ulah pabuatan katigo laki-laki tu,” kato Tan Baro manjalehan apo nan dimukasuiknyo.
“Ciek lai, kalau lai buliah juo awak mamintak, labiah barek hukuman nan jantan tu,” kecek Uncu baliak.
“Yo, kalau masalah hukuman tantu awak sarahan se ka hakim nantinyo. Nan pasti kalimo-limonyo, baiak nan padusi maupun nan jantan lah malangga undang-undang pornografi,” jawek Tan Baro.
Baitulah ota di lapau Uwo Pulin pagi kapatang. Ota bamulo dari barita di koran ‘Singgalang’ nan bajudul ‘Tiga Pria Penikmat Tari Telanjang Diburu’.
(eSPe St.Soeleman)
Postingan
Tidak ada komentar:
Posting Komentar