“Den sabananyo lah bosan mancaliak demo-demo bakapanjangan tu,” kato Udin Kuriak ka kawan-kawannyo nan samo duduak minum pagi di palanta lapau Uwo Pulin.
“Baa tu Din? Dek demo-demo tu lah awak lapeh dari maso Orde Baru mah,” baleh Angah Piyan.
“Kalau itu den lai paham. Nan jadi masalah di den, demo kini banyak nan indak murni lai. Salain itu, satiok ado demo, ricuh. Sudah tu dek ulah demo tajadi macet. Iko contoh nyato, gara-gara demo jalan manjadi macet. Kabatulan wakatu itu ado urang sakik nan paralu dibao ka rumah sakik. Karano sakiknyo indak tatahan lai, tapaso didukuang dek anaknyo sajauah sakilo. Iko kan aratinyo demo mambuek urang susah namonyo dek Angah tu,” kato Udin manjalehan sambia mampacaliak-an barita di koran ‘Singgalang’ nan bajudul ‘Terjebak Macet, Pasien Digendong 1 Kilometer’.
“Oh, jadi itu macet dek ulah demo yo? Den sangko tadi macet biaso Din,” potong Angah.
“Iyo. Iko macet dek ulah demo. Walau kajadiannyo indak di siko, tapi ikolah gambaran baraso demo juo mambuek urang susah. Kalau hanyo mangatokan pamarentah gagal den raso saluruh urang bisa. Tapi, apo kiro-kiro pakakeh nan bisa maukua baraso pamarentah tu gagal? Kalau hanyo manyuruah pamarentah nan ado kini mundur, apo memang itu solusi di negara ko? Apo tukang demo tu sadar baraso mangganti pamarentah tu indak sarupo mambaliak tapak tangan? Indak saketek biaya untuak mangganti pamarentah tu doh.
Apo lai ado jaminan panggantinyo beko labiah hebat? Awak ko kan mangaku santiang katiko manjadi panonton. Kalau lah masuak manjadi pamain, lah samo se jo nan banyak mah. Kalau lah manjadi pamain, bakaleperan kantuik dibueknyo,” baitu kato Udin mancubo mangaluakan apo nan ado di pikirannyo.
“Sapandapek wak Din. Harusnyo awak biakan pamarentah bakarajo. Kalau memang ado kakurangan dan kasalahan, salurkan pandapek elok-elok. Saandainyo memang harus pakai demo, yo bademolah jo santun. Ijan sampai marusak dan jan mambuek jalan macet. Kan ibo awak tu surang anak manggendong induaknyo di tangah hari badariak paneh sajauah sakilo. Ijankan bababan barek, bajalan santai se awak di Jakarta tu tangah hari lah litak juo dek nyo,” mangecek pulo Mak Pono.
“Demo-demo kini lah banyak nan dipasan Mak. Apolai kalau bahubuangan jo politik,” potong Kari Garejoh.
“Yo, buliah-buliah se demo. Buliah juo dipasan, tapi janlah sampai mangganduah atau jan sampai mambuek urang susah. Kalau jalan sampai macet dek ulah bademo, itu pasti susah urang banyak dek awak. Nan ka pai sikola atau pai karajo talambek dibueknyo. Parahnyo bantuak kajadian di barita koran ko. Urang sakik taambek pai baubek. Kok nyampang maningga pasien tu dek ulah macet demo tu, bara doso tukang demo tu? Apo indak pernah bapikia bantuak itu tukang-tukang demo salamo ko?” Baleh Udin.
“Kalau ndak macet dan kalau indak ricuh, ndak gadang baritanyo di tipi jo koran doh,” kecek Kari baliak.
“Kalau itu tujuannyo, lah salah kaprah tujuan demo namonyo mah,” kato Udin baliak.
Sarupo itulah diskusi atau ota urang-urang di lapau Uwo Pulin pagi kapatang. Matoari lah samakin tinggi, surang-surang mulai kalua dari lapau.
(eSPe St.Soeleman)
“Baa tu Din? Dek demo-demo tu lah awak lapeh dari maso Orde Baru mah,” baleh Angah Piyan.
“Kalau itu den lai paham. Nan jadi masalah di den, demo kini banyak nan indak murni lai. Salain itu, satiok ado demo, ricuh. Sudah tu dek ulah demo tajadi macet. Iko contoh nyato, gara-gara demo jalan manjadi macet. Kabatulan wakatu itu ado urang sakik nan paralu dibao ka rumah sakik. Karano sakiknyo indak tatahan lai, tapaso didukuang dek anaknyo sajauah sakilo. Iko kan aratinyo demo mambuek urang susah namonyo dek Angah tu,” kato Udin manjalehan sambia mampacaliak-an barita di koran ‘Singgalang’ nan bajudul ‘Terjebak Macet, Pasien Digendong 1 Kilometer’.
“Oh, jadi itu macet dek ulah demo yo? Den sangko tadi macet biaso Din,” potong Angah.
“Iyo. Iko macet dek ulah demo. Walau kajadiannyo indak di siko, tapi ikolah gambaran baraso demo juo mambuek urang susah. Kalau hanyo mangatokan pamarentah gagal den raso saluruh urang bisa. Tapi, apo kiro-kiro pakakeh nan bisa maukua baraso pamarentah tu gagal? Kalau hanyo manyuruah pamarentah nan ado kini mundur, apo memang itu solusi di negara ko? Apo tukang demo tu sadar baraso mangganti pamarentah tu indak sarupo mambaliak tapak tangan? Indak saketek biaya untuak mangganti pamarentah tu doh.
Apo lai ado jaminan panggantinyo beko labiah hebat? Awak ko kan mangaku santiang katiko manjadi panonton. Kalau lah masuak manjadi pamain, lah samo se jo nan banyak mah. Kalau lah manjadi pamain, bakaleperan kantuik dibueknyo,” baitu kato Udin mancubo mangaluakan apo nan ado di pikirannyo.
“Sapandapek wak Din. Harusnyo awak biakan pamarentah bakarajo. Kalau memang ado kakurangan dan kasalahan, salurkan pandapek elok-elok. Saandainyo memang harus pakai demo, yo bademolah jo santun. Ijan sampai marusak dan jan mambuek jalan macet. Kan ibo awak tu surang anak manggendong induaknyo di tangah hari badariak paneh sajauah sakilo. Ijankan bababan barek, bajalan santai se awak di Jakarta tu tangah hari lah litak juo dek nyo,” mangecek pulo Mak Pono.
“Demo-demo kini lah banyak nan dipasan Mak. Apolai kalau bahubuangan jo politik,” potong Kari Garejoh.
“Yo, buliah-buliah se demo. Buliah juo dipasan, tapi janlah sampai mangganduah atau jan sampai mambuek urang susah. Kalau jalan sampai macet dek ulah bademo, itu pasti susah urang banyak dek awak. Nan ka pai sikola atau pai karajo talambek dibueknyo. Parahnyo bantuak kajadian di barita koran ko. Urang sakik taambek pai baubek. Kok nyampang maningga pasien tu dek ulah macet demo tu, bara doso tukang demo tu? Apo indak pernah bapikia bantuak itu tukang-tukang demo salamo ko?” Baleh Udin.
“Kalau ndak macet dan kalau indak ricuh, ndak gadang baritanyo di tipi jo koran doh,” kecek Kari baliak.
“Kalau itu tujuannyo, lah salah kaprah tujuan demo namonyo mah,” kato Udin baliak.
Sarupo itulah diskusi atau ota urang-urang di lapau Uwo Pulin pagi kapatang. Matoari lah samakin tinggi, surang-surang mulai kalua dari lapau.
(eSPe St.Soeleman)
Postingan
Tidak ada komentar:
Posting Komentar