Kamanakan Mamak Tatangkok

“Tatangkok juo kamanakan awak tu jadinyo yo?”
Udin Kuriak sarupo mangecek jo dirinyo surang. Walau baitu, konco-konconyo mandanga jaleh apo nan dikatokannyo tu.
“Sia nan tatangkok Din?” Tanyo Angah Piyan.
“Kamanakan Angah Mah, maso indak tau,” baleh Udin.

“Iyo indak tau den doh, sia nan tatangkok tu? Tanyo Angah nio tau bana apo nan dimukasuik Udin.
“Iko ha!” Jawek Udin sambia mampacaliak-an koran nan sadang dibaconyo. Tampaklah di situ tatulih ‘Penari Telanjang Ditangkap Polisi’ mamakai huruf gadang-gadang. Taulah urang-urang salapau tu, kalau nan dimukasuik Udin adolah padusi manari talanjang nan dulu pernah ditangkok satpol pe-pe. Sasudah ditangkok dilapehan baliak. Tapi, sasudah lapeh, takana pulo padusi tu malangga hukum dan tapaso dicari polisi.
“Dulu balapehan, kini batangkok liak. Karajo a tu?” Kari Garejoh mancubo mananggapi apo nan dikatoan Udin.
“Dulu nan manangkok dan malapehannyo satpol pe-pe Ri. Kini nan manangkoknyo polisi,” kecek Udin manjalehan.
“Jan-jan sudah ko ado lo nan malapehannyo liak,” baleh Kari.
“Sia lo nan ka malapehan baliak?” Tanyo Angah.
“Mamak.....!” kato Kari manggantuang kalimatnyo.
“Apo lo urusan paja-paja jalang tu jo den?” Capek-capek Mak Pono manyalo.
“Kan itu kamanakan mamak,” jawek Kari basilengah.
“Eh, jan disangkuik-sangkuik an pulo padusi-padusi ibilih tu jo den Ri. Kamanakan den indak ado nan saroman itu surang juo doh,” kecek Mak Pono.
“Wak den indak mangatoan kamanakan Mak Pono doh, tapi kamanakan mamak. Den yakin paja-paja tu punyo mamak. Karano inyo anak Minang. Anak Minang ko kan ketek punyo bapak-mandenyo, lah gadang kamanakan mamak. Baa manuruik Tan Baro?” kato Kari manjalehan mancaliak Mak Pono lah mulai agak emosi.
“Batua. Padusi nan manari talanjang tu adolah anak-kamanakan kito basamo. Malu nan dipabueknyo kapatang tu adolah malu Minangkabau dan malu awak basamo. Karano itu manjadi tangguang jawek dek awak kasadonyo supayo mental jo parangai anak-anak tu bisa barubah ka nan elok. Baa juo lai, arang lah samo-samo tacoreang di kaniang awak salaku mamak di Minangkabau ko,” hanyo itu nan bisa dikatoan dek Tan Baro.
Mandanga panjalasan bantuak itu, baru Mak Pono tanang.
“Usie se paja-paja tu lai dari nagari ko!” Kato Mak Pono.
“Bia dibuang atau diusia ka lua nagari, nan inyo tatap anak Minang dan laki-laki Minang tatap manjadi mamaknyo. Jadi, rasonyo mambuang inyo bukanlah jalan elok. Ijan disamokan anak manusia jo anak kuciang. Kalau anak kuciang kumuah di ateh rumah iyo bisa awak buang kama nan taragak dek awak se. Tapi iko anak manusia. Sabejat-bejat inyo, pasti masih punyo hati nurani. Jadi, mari samo-samo awak arahan inyo ka jalan nan bana,” sambuang Tan Baro.
“Yo lah, kalau baitu baa juo lai. Samo-samo wak tahan se angek-dinginnyo. Karano inyo memang anak Minang,” kato Mak Pono baliak. (eSPe St.Soeleman)