Ka Mulai Dibangun

“Ka mulai dibangun kantua pamarentah di dakek awak ko lai nampaknyo mah Ngah.”
Baitu kato Udin Kuriak ka Angah Piyan nan samo-samo duduak di palanta lapau Uwo Pulin pagi kapatang. Salain Udin jo Angah, di lapau tu juo nampak Ajo Tondeh, Uncu Labai, Mak Pono dan Tacin Barain. Nan alun mancogok ka lapau samanjak rayo adolah Tan Baro, Kudun, Kari Garejoh sarato Pak Osu. Kabanyo urang-urang tu masih barirayo di kampuangnyo. Khusus Kudun memang alun ka baliak ka Padang dalam sapakan ko, karano kamanakannyo ka manikah jo urang rantau.

“Dima tampeknyo Din?” Tanyo Tacin Barain.
“Kalau manuruik barita nan den baco di koran ‘Singgalang’ hari ko, di Aie Pacah. Kan dakek dari siko dek Tacin tu,” jawek Udin.
“Kok di situ tampeknyo iyo dakek mah. Lah di pusat kota bana awak tingga bisuak mah. Itu aratinyo awak indak dipandang sabalah mato lai dek urang-urang nan salamo ko tingga dakek jo kantua walikota. Salamo ko awak kan bantuak anak tiri se. Ka-te-pe lai Padang, tapi saolah-olah indak dapek paratian,” baleh Tacin.
“Ikolah hikmah gampo gadang dulu Cin!” Potong Uncu Labai.
“Tapi takana di den, lai indak sakadar rencana se? Soalnyo pamarentah awak di siko labiah suko barancana,” kecek Tacin baliak.
“Suko barancana baa? Batanyo pulo Mak Pono.
“Satau den, lah banyak rancana pamarentah awak. Ado nan ka mambuek lubang kalam, malantai pantai Padang, mambuek lokasi balanjo sarupo Medan, mambuek pusat hiburan anak-anak sarupo Ancol, maoperasikan bus massal sarato lainnyo. Indak itu se doh, sasudah terminal manjadi tampek balanjo moderen, pamarentah juo barancana mambuek terminal baru.
Lah banyak lokasi nan diincar, tapi sampai kini maanyo? Jadi, itu makonyo den katoan, kalau soal rancana pamarentah awak ko nomor satu. Den kawatir, jan-jan pambangunan kantua pamarentah di Aie Pacah tu juo rancana,” baitu panjalasan Tacin ka konco-konconyo.
“Lai masih punyo rancana, indak masalah doh Cin. Nan bedo, sudahlah rancana indak ado, karajo juo indak nampak pulo,” potong Angah.
“Mudah-mudahan se nan iko indak sakadar rancana doh,” baleh Udin.
“Kalau memang lai jadi dimulai pambangunannyo, dalam pandangan den iko tamasuak prestasi lua biaso mah,” kecek Tacin baliak.
“Di ma lokasinyo di Aie Pacah Din?” Tanyo Angah.
“Kamungkinan di terminal kini tu,” jawek Udin.
“Tu, terminal di ma lai?” Tanyo Uncu.
“Samantaro masih sarupo kini. Pakai se jalan nan ado dulu. Kan nagari awak ko lah dapek namo punyo terminal paliang panjang sajak dulu mah. Iko paralu dipertahankan. Baa pandapek Ajo?” Jawek Tacin mampaiyokan ka Ajo Tondeh.
“Kalau manuruik den, bialah terminal ka Piaman di tampek kini je, buliah gampang ughang kampuang den baliak ka Piaman,” hanyo itu jawek Ajo.
“Ha...ha...., Ajo pasti kapentiangannyo nan didaulukan,” potong Mak Pono.
“Tantu iyo Mak. Di nagari ko sabalun ado kabijaksanaan, harus ado kabijaksinian dulu,” jawek Ajo sambia galak manih.
Baitulah ota di lapau Uwo Pulin pagi kapatang.
(eSPe St.Soeleman)